काठमाडौं (हाम्रो खेलकुद) – नेपाल सुपर लिग २ अन्तर्गत शुक्रबार भएको ललितपुर सिटी फुटबल क्लब र झापा फुटबल क्लबको खेल बराबरीमा सकिएको छ ।

दशरथ रंगशालामा दुवै टोलीले गोल गर्न नसक्दा अंक बाँडिएको हो । दुवै टोलीका लागि लिगमा यो चौथो बराबरी रह्यो । ललितपुर ६ खेलमा ११ अंकका साथ दोस्रो स्थानमा छ भने झापा ६ खेलमा ७ अंक जोड्दै पाँचौमा छ ।

चौथो मिनेटमा ललितपुर सिटी एफसी अग्रता लिनबाट थोरैले मात्र चुक्यो । दिनेश हेन्जनले बक्स बाहिरबाट गरेको प्रहार क्रसबारमा लागेपछि झापा पछि पर्नबाट बच्न सफल भयो ।

सातौं मिनेटमा अन्जन विष्टको पासमा आवास लामिछानेले बक्स बाहिरबाट लिएको प्रहारमा उनले सोचेजस्तो सम्पर्ण बनाउन सकेनन् ।

१३औं मिनेटमा मिडफिल्डमा विवेक पौडेलले बल नियन्त्रणमा लिन नसकेपछि झापाका सुमित श्रेष्ठले मौकाको फाइदा उठाएर अन्जन विष्टले लागि खेलेको पासमा ललितपुरका फ्रेन्च गोलरक्षक जेफ्री बाल्टुस लाइन अगाडि आएर बल समाते ।

२३औं मिनेटमा अन्जन विष्टका लागि वान अन वान अवसर सिर्जना हुँदा अन्तिम समयमा सनीश श्रेष्ठको ट्याकलले झापा अग्रता बनाउनबाट चुक्यो ।

३७औं मिनेटमा ललितपुरका निखिल कदमको क्रसमा इमोह इजीकिएलको हेडरले पोस्टको दिशा लिन सकेन ।

४५औं मिनेटमा अनन्त तामाङको गल्ती पछि बाल्टुसले ललितपुरको बचाउ गरे । छिरिङ गुरुङको क्रस क्लियर गर्ने क्रममा राम्रो सम्पर्क नबनाएर अनन्त चिप्लिएपछि जोर्जगे सान्चेजका लागि अवसर बनेको थियो । तर बाल्टुसले सान्चेजको प्रहार आफ्नो खुट्टाले बचाए ।

४८औं मिनेटमा दिनेशको क्रसमा निखिल कदमले बक्स भित्र प्रहार गर्ने क्रममा बलमा सम्पर्क बनाउन सकेनन् । सोही मिनेटमा सनीशको क्रसमा केबेको हेडर स्टेफन कुपिचले बचाए ।

५०औं मिनेटमा इमोहको क्रसमा केबेको अर्को प्रहार पनि कुपिचले विफल पारे । ५७औं मिनेटमा अन्जनको बक्स भित्रबाट गरेको प्रहार पनि पोस्टको दिशामा गएन ।

६२औं मिनेटमा दिनेशको बक्स बाहिरबाट गरेको प्रहार डिफ्लेक्ट भएर पोस्टको केही माथिबाट बाहिरियो । त्यसपछिको कर्नरमा सेसेहाङले खाली रहेको अवस्थामा चाहेजस्तो प्रहार गर्न सकेनन् ।

८७औं मिनेटमा इमोहको ओभरहेड प्रहार पोस्ट बाहिर जान पुग्यो । इन्ज्युरी समयको पहिलो मिनेटमा इमोहले बक्स भित्रबाट पोस्टको धेरै माथि गरे । तेस्रो मिनेटमा सनीशको क्रसमा केबेको हेडर छिरिङले ब्लक गरे ।

पाँचौं मिनेटमा अनन्तको हेडर सिधै कुपिचको हातमा जन पुग्यो । यस्तै खेलको अन्तिम मुभमा आदित्य शाक्यको बक्सको छेउबाट लिएको प्रहार सिधै कुपिचको हातमा पुगेपछि खेल गोलरहित बराबरीमा सकियो ।

शनिबार लिग अन्तर्गत दशरथ रंगशालामा दुई खेल हुनेछन् । पहिलो खेलमा दिउँसो १ बजे पोखरा थन्डर्स र वीरगन्ज युनाइटेड खेल्नेछन् । दोस्रो खेलमा स्पोर्टिङ इलाम डे मेची एफसी र एफसी चितवनबीच साँझ ५ बजे खेल हुनेछ ।