काठमाडौँ (हाम्रो खेलकुद) – नेपाली गोलकिपिङ प्रशिक्षक मनिष तिम्सिना एएफसी गोलकिपिङ ‘ए’ डिप्लोमा लाइसेन्स हासिल गर्ने पहिलो नेपाली बनेका छन् । तिम्सिनाले मलेसियाली फुटबल एसोसिएसनले आयोजना गरेको कोर्समा लाइसेन्स हासिल गरेका हुन् ।

तीन वर्षदेखि आइलिग क्लब गोकुलम केरलाको गोलकिपिङ प्रशिक्षक रहेका तिम्सिनाले लाइसेन्स हासिल गरेपछि हाम्रो खेलकुदसँग कुरा गर्दै आफ्नो खुशी व्यक्त गरे । तिम्सिनाले यो आफ्नो करियरको भर्खर सुरुआत भएको बताउॅदै आफू व्यावसायिक जीवनमा प्रवेश गरेको अनुभूति बताएका छन् ।

‘यो मेरो करियरको सुरुवातसॅगै व्यावसायिक करियरमा प्रवेश गरेजस्तो लाग्छ’, तिम्सिनाले भने. ‘यो सबैभन्दा शीर्ष गोलकिपिङ लाइसेन्स हो । म यो लाइसेन्स लिएर संसारको जुनसुकै ठाउँमा काम गर्न सक्छु ।’

थप भावुक हॅुदै तिम्सिनाले यस उपलब्धि उनको एक्लो नभई सम्पूर्ण नेपालीले पनि फुटबल जगतमा राम्रो गर्न सक्ने बताए ।

‘यो मात्र मेरो उपलब्धि होइन, यो मेरो देशको उपलब्धि हो । म जहाँ जान्छु, जे पनि हासिल गर्छु, सबै हासिल गर्ने एक नेपाली हो । सबैले म भित्र नेपाली झण्डा देख्छन् । यसले नेपालीहरूले फुटबलमा ठूला कुराहरू पनि हासिल गर्न सक्छन् भन्ने देखाउँछ ।’

मलेसियालाई यो लाइसेन्स प्राप्त गर्न गाह्रो ठाउँ मानिन्छ । र लाइसेन्स त्यहाँ पाउँदा आफूलाई निकै खुसी लागेको उनी बताउँछन् ।

यो लाइसेन्ससँगै तिम्सिनाले एशियाका ठूला लिग र ठूला टोलीमा काम गर्ने लक्ष्य राखेको बताउछन् । ‘मैले भारतमा तीन वर्ष सफलतापूर्वक काम गरेको छु जुन अहिले एशियामा धेरै ठूलो फुटबल बजार हो’, उनी भन्छन् ।

‘अब यो लाइसेन्सका साथ म एशियाका ठूला लिगहरूमा ठूला क्लबहरूमा काम गर्न योग्य भएको छु । आउने दिनमा थप ज्ञान प्राप्त गर्ने लक्ष्य राखेको छु ।’

यो लाइसेन्ससँगै तिम्सिनाले नेपालको गोलकिपिङको अवस्थाबारे केही विचार समेत व्यक्त गरे । तिम्सिनाले भर्खरै सम्पन्न नेपाल सुपर लिगले नेपालले युवा र गोलकिपिङको जगमा कत्तिको काम गर्नुपर्छ भन्ने देखाएको बताए । थप, उनले एन्फाले पनि शीर्ष लाइसेन्स गोलकिपिङ प्रशिक्षक ल्याउन जोड गर्नु पर्ने बताए ।

‘एन्फाले नेपालमा प्रो लाइसेन्स प्रशिक्षक ल्याउँदा राष्ट्रिय टोलीका लागि शीर्ष लाइसेन्स गोलकिपिङ प्रशिक्षक पनि ल्याउनुपर्छ,’उनले भने ।

‘भर्खरै सम्पन्न भएको एनएसएल ले हामीलाई गोलकिपिङ विभागमा युवा र जगमा कसरी काम गर्न आवश्यक छ भनेर देखाएको छ। त्यहाँ धेरै पहिलो रोजाइका विदेशी गोलकिपरहरू थिए जसले विभिन्न टोलीमा आए र नेपाली गोलकिपरहरूलाई बेन्चमा राखे।’

उनले थपे, ‘यसबाट हामी यस विभागमा कति गम्भीर हुनुपर्छ भन्ने देखाउँछ। गोलकिपिङलाई आधुनिकीकरण गरिएको छ । यसमा हामी थप गम्भीर हुन जरुरी छ ।’

तिम्सिना हाल कलिंगा सुपर कपका लागि गोकुलम केरलासँग भारतको ओडिशामा छन् र उपाधि जित्ने लक्ष्य राख्छन् । ‘हामीले भर्खरै आईएसएल टोलीहरू विरुद्ध डुरान्ड कप र अन्य प्रतियोगिताहरूमा राम्रो प्रदर्शन गरेका छौं। हामीसँग गुणस्तरीय खेलाडी छन्, गुणस्तरीय स्टाफ छन् । हामी शीर्ष स्तरको प्रतियोगिता खेलिरहेका छौं र हामी उपाधिका लागि लड्नेछौं’, उनले भने ।

एन्फाको धरान एकेडेमीका गोलकिपर प्रशिक्षकका रुपमा कार्यरत ३३ वर्षे तिम्सिनाले खेलाडीका रुपमा थ्री स्टार, आरसिटी, हिमालयन शेर्पा, बाँसबारी, स्वयम्मु, ब्रिगेड ब्वाइजबाट खेले । आइ लिग टोलीमा कुनै पनि प्रशिक्षकका रुपमा आबद्ध भएका उनी पहिलो नेपाली हुन् । पूर्वाञ्चलबाट पाँचौ राष्ट्रिय खेलकुदमा स्वर्ण पदक जितेका तिम्सिना दश वर्षयता प्रशिक्षणमा सामेल छन् । विराटनगरका उनले साफ यू १५ मा नेपाली टोलीको गोलकिपर प्रशिक्षकको भूमिका पनि निर्वाह गरिसकेका छन् ।