एजेन्सी – अन्तिम समयको गोलसँगै साउदी अरेबियाले एएफसी एसियन कपमा ओमान विरुद्ध नाटकीय जित निकालेको छ ।

गत वर्ष विश्वकपमा अर्जेन्टिना माथि जित निकाल्दै सनसनी रचेको साउदीले मंगलबार १-० ले पछि पारेको अवस्था उल्ट्याउँदै २-१ को जित निकालेको हो ।

१-१ को बराबरीमा उन्मुख खेलको इन्ज्युरी समयको छैठौं मिनेटमा अर्को गोल गर्दै साउदीले सनसनीपूर्ण जित निकालेको थियो।

अलि अल-बुलाहीको हेडर गोलले भिडियो असिस्टेन्ट रेफ्रीको जाँच पछि मान्यता पाएको थियो । उता रेफ्रीको इशारा नबुझेपछि साउदीको गोलले मान्यता नभएको बुझेर ओमानी खेलाडी खुसी साट्न थालेका थिए । त्यसपछि पनि रेफ्रीले साउदीको गोल इशारामा गरेका दिए ।

कतारको अल-रायन स्थित खलिफा अन्तराष्ट्रिय स्टेडियममा भएको खेलमा साउदीले सिर्जना गरेको अवसरहरुको सदुपयोग गर्न नसक्दा खेलमा पकड बनाउन सकेन ।

१४ औं मिनेटमा साउदी खेलमा पछि परेको थियो । साउदीको खराब कर्नर पछिको काउन्टरमा हसन अल-तम्बाक्टीले मुहसेन अल-घसानीलाई बक्समा लडाएपछि ओमानले पेनाल्टी पाएको थियो । पेनाल्टीको सदुपयोग गर्दै सलाह अल-याहयैले ओमानलाई अग्रता दिलाएका थिए ।

खेलमा पछि परेपछि लगातार आक्रमण गरेको साउदीलाई विफल पार्न ओमानले अनुशासित रक्षात्मक प्रदर्शन गरेको थियो ।

दोस्रो हाफमा साउदीले सुधारिएको प्रदर्शन गरेको थियो । केही अवसर खेर फालेपछि ७८औं मिनेटमा अब्दुलरहमान घरिबले ४ डिफेन्डरलाई छक्याएर सानदार गोल गर्दै खेललाई बराबरीमा पुर्याएका थिए।

समूह ‘एफ’मा साउदी र त्यसअघि मंगलबार नै जित कीर्गिस्तान विरुद्धको २-० को जित निकालेको थाइल्यान्डको समान ३ अंक छ । साउदी र ओमानको खेलसँगै एसियन कपमा पहिलो चरणका खेल सकिएको छन् ।

एसियन कपमा बुधबार समूह ए का २ खेल हुँदैछन् । साँझ ५:१५ बजे लेबनान र चीन तथा साँझ ८:१५ बजे हुने घरेलु टोली कतार र ताजिकिस्तानबीच खेल हुनेछ।
पहिलो खेलमा कतारले लेबनानलाई ३-० ले हराएको थियो भने चीन र ताजिकिस्तानले गोलरहित बराबरी खेलेका थिए ।