दिपक बोहोरा, इलाम

इलाम आजबाट फुटबलमय हुँदैछ । २०७६ पछि इलाममा फुटबल फर्किएको छ । एनआरएनए इलाम गोल्ड कप फुटबल प्रतियोगिता आज (शनिबार) सुरु हुँदैछ । यसले इलाम फुटबलमय हुने अपेक्षा गरिएको छ । सदरमुकामको ठूलो टुँडिखेलमा प्रतियोगिता हुनेछ ।

रेडहर्स फुटबल क्लबले आयोजना गरेको प्रतियोगिताको उद्घाटन खेलमा आयोजक र भारत दार्जिलिङको मानेभञ्ज्याङ (एमएफसी) बीच प्रतिस्पर्धा हुनेछ । प्रतियोगितामा ‘ए’ डिभिजन क्लब न्युरोड टिम (एनआरटी) , एनएसएल क्लब बुटवल लुम्बिनी एफसी, पाँचथर एफसी, बिर्तामोड युनाइटेड झापा, राष्ट्रिय जागृति क्लब इटहरी, बाग्मती युवा क्लब सर्लाही, आयोजक र मानेभञ्ज्याङले प्रतिस्पर्धा गर्नेछन् ।

उद्घाटनका लागि ठूलो टुँडिखेल सिँगारिएको छ । खेलमैदान मर्मत, बाँसको अस्थायी प्यारापिट निर्माणलगायत सबै तयारी पूरा भएको आयोजक क्लबका सचिव प्रकाश घिमिरेले बताए । उद्घाटन समारोहमा भ्वाइस् अफ् नेपाल सिजन ५ विजेता इलामे विनोद राई र इलामकै गायक यम बरालको प्रस्तुति रहने छ ।

प्रतियोेगिताको पहिलो चरणका लागि १ सय, सेमिफाइनलमा २ सय र फाइनलमा ३ सय रुपैयाँ टिकट दर तोकिएको सचिव घिमिरेले जनाए । गैरआवासीय नेपाली ( एनआरएन) ले प्रतियोगितालाई प्रायोजन गरेको छ ।

माघ १३ गते हुने फाइनलको विजेताले ५ लाख र दोस्रो हुने टोलीले ३ लाख रुपैयाँ प्राप्त गर्नेछ । सर्वोत्कृष्ट खेलाडी, सर्वाधिक गोलकर्ता, उत्कृष्ट गोलकिपर, डिफेन्डर, मिडफिल्डर र उदीयमान खेलाडीलाई पुरस्कृत गरिने आयोजकले जनाएको छ ।