पोखरा (हाम्रो खेलकुद)– सहारा क्लबको आयोजनामा पोखरामा निरन्तर सञ्चालित ‘आहा रारा पोखरा गोल्डकप फुटबल प्रतियोगिता’ को पोखरा महानगरपालिका संरक्षक बनेको छ ।

२०५७ को क्याराभान त्यसपछि आहाको नाममा आयोजना भएको प्रतियोगिताको २३ औं संस्करण माघ ९ गतेबाट पोखरा रंगशालामा सन्चालन हुनेछ । घरेलु फुटबलमा आहा गोल्ड कप नियमित संचालित एकमात्र प्रतियोगिता हो ।

पोखरा महानगरपालिकाको २५ औं कार्यपालिका बैठकले ‘पोखरा गोल्डकप’ नामकरण यसको संरक्षकत्व ग्रहण गरेकामा
सहाराका अध्यक्ष केशवराज बरालको अध्यक्षतामा शुक्रबार बसेको क्लबको बैठकले आभार व्यक्त गरेको सहाराले जनाएको छ ।

माघ २० गते सम्म सञ्चालन हुने फुटबल प्रतियोगितामा यसपटक १२ टोलीको सहभागिता रहनेछ । उद्घाटन खेल आयोजक र थ्री स्टार क्लबीच हुनेछ ।

२०६१ सालदेखि आवासीयरुपमा निशुल्क स्वास्थ्य, शिक्षा, दीक्षा लगायत फुटबल प्रशिक्षण दिँदै आएको क्लबले पोखरा १७, दोबिल्लामा सूर्यबहादुर केसी स्मृति सहारा फुटबल एकेडेमी संचालन गर्दै आएको छ । हाल चौंथो ब्याचमा बालक भर्ना भएका छन् ।

प्रतियोगितामा १ करोड ८६ लाख आम्दानी र १ करोड ४९ लाख खर्च हुने आयोजकको अनुमान छ । बचत रकम सहारा एकेडेमीमा खर्च गरिने आयोजकले जनाएको छ ।हिमश्री फुड्स प्रालि मुख्य प्रायोजन गरेको गोल्ड कपमा अन्य थुप्रै संघ संस्थाको सहकार्य रहेको छ ।