पोखरा (हाम्रो खेलकुद)- बगर भाइ खलकको आयोजनामा आइतबारबाट सुरु हुने दोस्रो हिमालयन ब्रअरी तथा तेहौं बगर भाइ खलक अन्तर्राष्ट्रिय भेट्रान फुटबल प्रतियोगितामा ३६ टोलीले को सहभागिता रहने भएको छ ।

पोखरा १ टुडिखेल मैदानमा हुने एट ए साइड फुटबल प्रतियोगिताको तीन वटा उमेर समूहमा हुने बिहिबार आयोजित पत्रकार सम्मेलनमा बोल संस्थाका अध्यक्ष दिलबहादुर गुरुङले जानकारी दिए। यसपटक ४० वर्षमाथि, ५० वर्ष माथि र ६० वर्षमाथि गरि तीन उमेर सहुमा प्रतियोगिता हुने बताइएको छ।

‘हामीले यस पटक तीन उमेर समूहको प्रतिस्पर्धा गर्दैछौ । प्रतियोगिताको मुख्य उद्देश्य भनेको ग्रास रुट फुटबल खेलाडी उत्पादन गर्नु हो’ अध्यक्ष गुरुङले भने, ‘ग्रास रुटको विकासमा बुढाहरुको फुटबल किन भनियो भने बुढाहरु त खेल्दा रहेछन हामी पनि खेल्नुपर्छ भन्ने भावना युवा पुस्तामा जगाउन भेट्रान फुटबलको आयोजना गरेका हौं।’

सोही अवसरमा संस्थाले पूर्व राष्ट्रिय खेलाडी सम्मानबाट यसपटक शम्भु केसीलाई सम्मानित गर्ने भएको छ । केसी राखेपका पूर्व प्रशिक्षक हुन् ।

प्रतियोगिताको ४० वर्षमाथि उमेर समूहको विजेताले २ लाख र दोस्रो हुने टोलीले १ लाख रुपैयाँ प्राप्त गर्नेछ । सर्वोत्कृष्ट खेलाडीले १५ हजार तथा उत्कृष्ट गोलरक्षक, डिफेन्डर, मिडफिल्डर, फरवार्ड र प्रशिक्षकले भने समान ५ हजार रुपैयाँ प्राप्त गर्नेछन् । ४० वर्षमाथिमा २३ टोलीको को सहभागिता रहने छ ।

५० वर्षमाथि उमेर समूहको विजेताले १ लाख रुपैयाँ र दोस्रो टोलीले ले ५० हजार रुपैयाँ प्राप्त गर्नेछ । ५० वर्षमाथिमा ९ टोलीको सहभागिता रहने छ ।

६० वर्षमाथिको विजेता टोलीले ले ५० हजार र दोस्रो हुने टोलीले ३० हजार रुपैयाँ प्राप्त गर्नेछ । सो विधामा ४ टोलीको सहभागिता रहनेछ ।

एक हप्तासम्म चल्ने प्रतियोगितालाई मुख्य प्रायोजकको रुपमा हिमालयन ब्रुअरी प्रा.लि र सह–प्रायोजकको रुपमा बगर भाइ खलक युके रहेको छ ।
माघ २७ गतेसम्म सञ्चालन हुने प्रतियोगितामा पोखरासहित भारतको देहरादु, काठमाडौं, ललितपुर, चितनव, सिरहा, हेटौडा, सर्लाही, बुटवल, सिमरा, कैलाली, पाँचथरबाट सहभागिता रहने बताइएको छ । बगर भाइखलकले २०६८ सालदेखि निरन्त भेट्रान फुटबल आयोजना गर्दै आएको‌ छ ।