काठमाडौं (हाम्रो खेलकुद) – नेपाली फरवार्ड सावित्रा भण्डारी ‘साम्बा’ सम्मिलित एन अभान्ट ग्वेंगाम्पले फ्रान्सको शीर्ष डिभिजन डी१ एर्केमा अन्तर्गत खेलमा फ्लुरी ९१ लाई पराजित गरेको छ ।

घरेलु मैदानमा ग्वेंगाम्पले ३-१ को जित दर्ता गरेको हो । सावित्राले खेलको अन्तिम १५ मिनेट अवसर पाएकी थिइन् । पहिलो हाफमा १-० को अग्रता लिएको टोलीले दोस्रो हाफमा २ गोल थपेको थियो । अन्त्यतिर एक गोल खाएपनि ग्वेंगाम्प सिजनको तेस्रो जित दर्ता गर्न सफल रह्यो ।

पहिलो हाफको ४५ औं मिनेटमा सराह काम्बोतले फ्रिकिकमा सिधै गोल गर्दै घरेलु टोलीलाई अग्रता दिलाइन् । दोस्रो हाफको सुरुवातमै एन्टोइन स्टारोभाले पेनाल्टीमा गोल गर्दै २-० को अग्रता दिलाइन् ।

७३ औं मिनेटमा एलिसन पेनिगुएलले क्रसमा आएको बललाई पोस्टको दिशा दिँदा टोली ३-० ले अघि बढ्यो । टोलीको फराकिलो अग्रता भएपछि सावित्राले मैदान छिर्ने अवसर पाइन् । तर अग्रता जोगाउन तल्लिन टोलीले खासै आक्रमणमा अवसर पाएन । ८८ औं मिनेटमा फ्लुरीकी एरिन फोन्टेनले सान्तवना गोल फर्काइन् ।

यस जितसँगै दशौं स्थानमा रहेको ग्वेंगाम्पको १४ खेलमा १२ अंक भएको छ । नवौं स्थानको डिजोनले १५ खेलमा १३ अंक जोड्दा रेलिगेसन क्षेत्रको लिलको १५ खेलमा ८ र बोर्डोको १४ खेलमा ६ अंक छ ।

ग्वेंगाम्पले अब अर्को शनिबार हुने खेलमा पेरिस सेन्ट जर्मेनको सामना गर्नेछ । साम्बाले गत साता पनि बेन्चबाट मैदान प्रवेश गरेकी थिइन् ।