काठमाडौँ (हाम्रो खेलकुद) – फ्रेन्च शीर्ष डिभिजन टोली एन अभान्ट ग्वेंगाम्पमा सम्मिलित नेपाली राष्ट्रिय टोलीकी फरवार्ड सावित्रा भण्डारी ‘साम्बा’ बलियो टोली पेरिस सेन्ट-जर्मेन विरुद्ध आज हुने खेलमा नखेल्ने भएकी छिन् । एन अभान्ट ग्वेंगाम्पले सार्वजनिक गरेको स्क्वाडमा उनको नाम समावेश गरिएको छैन ।

यस खेल गत नोभेम्बर ४ मा खेल्ने तालिका रहेको थियो । तर भारी वर्षाका कारण म्याच रेफ्रीले पिच खेल्न नसकिने बताएपछि खेल स्थगित हुँदै आजको मितिमा सारिएको थियो । 

फ्रेन्च लिग नियम अनुसार स्थगित गरी पछि सारिएको खेलमा सोहि बेलासम्म दर्ता भएका खेलाडीहरु मात्र खेलाउन पाइन्छ । साम्बा गत जनवरीमा मात्र ग्वेंगाम्पमा पुगेकी थिइन् । सो मितिमा उनी लिगमा दर्ता नभएको कारण आज खेल्न पाउने छैनन् । 

यस्तै साम्बा नेपाली टोलीका लागि साउदी अरेबियामा हुने वाफ च्याम्पियनसिपमा सहभागिता जनाउन आज नै त्यसतर्फ प्रस्थान गर्ने छिन् । उनी आजको खेलमा उपस्थित भएर पेरिसबाट नै साउदीतर्फ प्रस्थान गर्ने छिन् । नेपाली टोली भने हिजो नै साउदीका लागि प्रस्थान गरिसकेको छ । 

साम्बाले हालसम्म ग्वेंगाम्पका लागि दुई खेल खेलेकी छन् । उनले फेब्रुअरी ३ मा बोर्डो विरुद्ध ७५औ मिनेटमा मैदान प्रवेश गरेर साम्बाले डेब्यु गरेकी थिइन् । बोर्डो विरुद्धको सो खेल १-१ को बराबरीमा सकिएको थियो । यस्तै गत शनिवार फ्लिउरी ९१ विरुद्ध पनि दोस्रो हाफमा मैदान प्रवेश गर्दै खेलको अन्तिम समयमा सहभागिता जनाएकी थिइन् । सो खेल ग्वेंगाम्पले ३-१ ले जितेको थियो । 

साम्बाले शीर्ष डिभिजन क्लब अन आभान्ट ग्वेंगाम्पसँग डेढ वर्षको सम्झौता गरेकी छिन् । इजरायलको हापोएल रानानासँग फ्रान्सेली क्लबको सहमति भएपछि साम्बा फ्रान्सतर्फ प्रस्थान गरेकी थिइन् । युद्धका कारण इजरायल नफर्केकी साम्बाले त्यहाँ छोटो समयमा जमेको प्रभावले फ्रान्सको यात्रा सम्भव भएको थियो ।