एजेन्सी – इंग्लिश प्रिमियर लिग अन्तर्गत शनिबार साँझ भएको पहिलो खेलमा लिभरपुल विजयी भएको छ । लिभरपुलले ब्रेन्टफोर्ड माथि ४-१ को जित निकालेको हो ।

पहिलो हाफमा नै चोटका कारण दुई खेलाडी गुमाउन पुगेको लिभरपुलले अन्त्यसम्म उत्कृष्ट प्रदर्शन गर्दै जित भने दर्ता गर्यो ।

३५औं मिनेटमा डियोगो जोटाको पासमा डार्विन नुनेजले उत्कृष्ट चिप गोल गर्दै खेलमा लिभरपुलका लागि अग्रता दिलाएका थिए । ५५औं मिनेटमा मोहम्मद सालाहको पासमा एलेक्सिस मकयालिस्टरले लिभरपुलको अग्रता दोब्बर बनाए ।

६८औं मिनेटमा सालाहले तेस्रो गोल गरे । गोलकिपर केलेहरले दिएको लामो पासमा कोडी गाक्पोले हेडर गर्दै बल सालाहको दिशा तर्फ खेलेपछि सालाहले कुनै गल्ती नगरी गोल गर्न सफल भए ।

७५औं मिनेटमा ब्रेन्टफोर्डका लागि इभान टोनीले एक गोल फर्काएका थिए । तर ८६औं मिनेटमा लुइस डियाजको पासमा गाक्पोले चौथो गोल गर्दै जित सुनिश्चित गरे ।

जित पछि शीर्ष स्थानमा रहेको लिभरपुलको २५ खेलमा ५७ अंक भएको छ । दोस्रो स्थानमा रहेको म्यानचेस्टर सिटीको २३ खेलमा ५२ अंक छ । ब्रेन्टफोर्ड भने २४ खेलमा २५ अंक सहित १४औं स्थानमा छ ।

प्रिमियर लिगमा आज थप ६ खेल हुँदै छन् । राती ११:१५ बजे म्यानचेस्टर सिटी र चेल्सी भिड्ने छन् ।