काठमाडौं (हाम्रो खेलकुद) – साविक विजेता मछिन्द्र एफसी काठमाडौंमा जारी दोस्रो संस्करणको केपी ओली कपको फाइनलमा प्रवेश गरेको छ । दशरथ रंगशालामा भएको दोस्रो सेमीफाइनल खेलमा भारतीय टोली मानेभञ्ज्याङ एफसी माथि ५-० को फराकिलो जित दर्ता गर्दै मछिन्द्रले फाइनलमा आफ्नो स्थान पक्का गरेको हो ।

पछिल्लो खेलमा नेपाल पुलिस क्लब विरुद्ध पनि चार गोल गरेको मछिन्द्रले आज भने सो नतिजा सुधार्यो । खेलको पहिलो गोल विमल घर्ती मगरले उत्कृष्ट फ्रिकिक प्रहार गर्दै गरेका थिए । दायाँ फ्लान्कमा पाएको फ्रिकिक उनले सिधै पोस्टमा प्रहार गरेका थिए ।

त्यसको दुई मिनेटमा मछिन्द्रले अग्रता दोब्बर गर्यो । लाकेन लिम्बूले आफ्नो हाफबाटै क्लियर गरेको बलमा वान अन वान अवसर बनाउँदै स्टेफन बिनोङले किपरलाई चिप गर्दै गोल गरेका थिए ।

३८औं मिनेटमा मछिन्द्रले आत्मघाती गोल उपहार पायो । हिसुब थपलियाले गरेको पहिलो प्रहार मानेभञ्ज्याङका गोलरक्षक लालमुआनसांगाले बचाएपछि हिसुबको दोस्रो प्रहार भने उनले आफ्नै जालीमा छिराएका थिए ।

५४औं मिनेटमा मछिन्द्रले खेलको चौथो गोल गर्यो । उत्सव राईले खेलेको कर्नरमा देवेन्द्र तामाङले हेडर मार्फत गोल गर्दै अग्रता चार गोलको बनाए ।

पाँचौं गोल आयुष घलानले इन्ज्युरी समयमा गरे । हिसुबको प्रहार गोलरक्षकले बचाएपछि उनले बल लिएर सहजै गोल गरेका थिए ।

उपाधि रक्षा गर्ने तरखरमा रहेको मछिन्द्रले अब उपाधिका लागि न्यू रोड टिम (एनआरटी) को सामना गर्ने छ । एनआरटीले आज पहिलो सेमिफाइनलमा जावलाखेल युथ क्लब माथि ३-० को जित निकाल्दै फाइनलमा आफ्नो स्थान सुरक्षित गरेको हो ।

फाइनल फागुन १९ गते दशरथ रंगशालामा नै हुनेछ ।प्रतियोगिताको विजेताले ११ लाख रुपैयाँ र दोस्रो हुने टोलीले ५ लाख रुपैयाँ प्राप्त गर्नेछन् । प्रतियोगिता सर्वोत्कृष्ट खेलाडीले १ लाख, उत्कृष्ट गोलरक्षक, गोलकर्ता र उदीयमान खेलाडीले समान ५० हजार रुपैयाँ पाउनेछन् ।