एजेन्सी – लन्डन क्लब चेल्सीले इंग्लिस प्रिमियर लिगमा रोमाञ्चक जित दर्ता गरेको छ । चेल्सीले घरेलु मैदानमा न्यूक्यासल युनाइटेडमाथि ३–२ को रोमाञ्चक जित निकालेको हो ।

स्टामफोर्ड ब्रिजमा सोमबार राति भएको खेलमा चेल्सीको जितमा निकोलस ज्याक्सन, कोल पाल्मेर मिखाइलो मुड्रिचले गोल गरे । न्यूक्यासलका एलेक्सान्दर इसाक र ज्याकोव मर्फीले गोल फर्काए ।

खेलको छैटौं मिनेटमा ज्याक्सनले गोल गर्दै चेल्सीलाई १–० को अग्रता दिलाए । उनले कोल पाल्मेरको पासमा गोल गर्न सफल भए । ४३औं मिनेटमा इसाकले गोल गर्दै खेललाई १–१ गोलको बराबरीमा ल्याए । उनले ब्रुनो गुइमारेसको पासलाई सदुपयोग गरेका थिए ।

५७औं मिनेटमा कोल पाल्मेरले गोल गर्दै चेल्सीलाई २–१ को अग्रता दिलाए । उनले एन्जो फर्नान्डेसको पासमा गोल गर्न सफल भए । ७६औं मिनेटमा मिखाइलोले गोल गरेपछि चेल्सी ३–१ को अग्रतासहित सहज जिततर्फ अघि बढ्यो ।

तर, इन्ज्युरी समयो थप गरिएको पहिलो मिनेटमा मर्फीले गोल गर्दै खेललाई ३–२ को स्थितिमा ल्याएपनि त्यसपछि थप गोल निस्कन नसक्दा चेल्सीले महत्वपूर्ण ३ अंक बटुल्न सफल भयो ।

यस जितले चेल्सी २७ खेलबाट ३९ अंक जोडेर ११औं स्थानमा यथावत छ । पराजित न्यूक्यासल २८ खेलबाट ४० अंक जोडेर १०औं स्थानमा छ ।