एजेन्सी – इंग्लिस क्लब म्यानचेस्टर सिटीका ब्राजिली गोलरक्षक एडर्सन मोराएस चार साता मैदान बाहिर रहने भएका छन् । मांसपेशीको चोटका कारण मोराएस कम्तीमा एक महिना बाहिर रहने भएका हुन् ।

मोराएसले आइतबार लिभरपुलसँग १–१ गोलको बराबरी खेलमा मांसपेशीमा चोट बोक्न पुगेका थिए । लिभपुलका फरवार्ड डार्विन नुनेजलाई आफ्नै बक्समा फउल गर्न पुग्दा उनी आँफैले पनि चोट बोक्न पुगेका थिए ।

सोही पेनाल्टी गोलबाट नै सिटी जितबाट बञ्चित बन्न पुगेको थियो । सिटीले उनलाई प्राथमिक उपचार गराएर मैदानमै राखेपनि खेल्न नसक्ने भएपछि उनलाई स्टेफान ओर्टेगाले प्रतिस्थापन गरेको थियो ।

चोट बोकेसँगै ३० वर्षीय एडर्सनले ३१ मार्चमा हुने उपाधि प्रतिद्वन्द्वी आर्सनलसँगको महत्वपूणै खेल गुमाउने छन् । सिटी २८ खेलबाट ६३ अंक जाेडेर तेस्राे स्थानमा रहँदा आर्सनल ६४ अंक जाेडेर शीर्षस्थानमा छ । समान अंक भएपनि लिभरपुल गाेल अन्तरमा दाेस्राे स्थानमा छ ।

उनले शनिबार हुने एफए कपको क्वाटरफाइनलमा न्युक्यासल युनाइटेडसँगको खेल पनि गुमाउनेछ । त्यसपछि अन्तर्राष्ट्रिय ब्रेक रहेको छ । चोटपछि उनी ब्राजिली टोलीबाट पनि बाहिरिने पक्का छ । एडर्सनको अनुपस्थितिमा अब सिटीको पोस्ट जर्मन गोलरक्षक ओर्टेगाले नै सम्हाल्नेछन् ।