सुशिल पन्त क्षेत्री, चितवन

रामपुर एफसी रड्सविरुद्ध सहज जित हात पार्दै आबुखैरहनी गाउँपालिका सेन्ट्रल कलेज प्रथम भरतपुर फुटबल च्याम्पियनसिपको सेमिफाइनलमा प्रवेश गरेको छ ।

शुक्रबार तेस्रो क्वाटरफाइनलमा आबुखैरहनीले रामपुर रड्सलाई ३–१ ले हरायो । आबुखैरहनीको जितमा कप्तान शन्त गुरुङले २ र अबायमीले १ गोल गरे । रड्सका कप्तान अनिल राना मगरले गोल गरे ।

चौथो मिनेटमा नै आबुखैरहनीले गोल गर्दै अग्रता लिएको थियो । जितेश गुरुङको पासमा गोल गर्दै शन्तले आबुखैरहनीलाई अग्रता दिलाए । पहिलो हाफमा नै रड्सले बराबरी गोल फर्कायो । कप्तान अनिलले पहिलो हाफको इन्ज्युरी समयमा गोल गरेका हुन् ।

४९ औं मिनेट अबायमीले गोल गर्दै आबुखैरहनीलाई २–१ को अग्रता दिलाए । ६० औं मिनेटमा शन्तले व्यक्तिगत दोस्रो गोल गरेपछि आबुखैरहनी ३–१ ले विजयी भयो । शन्त नै म्यान अफ दि म्याच भए ।

चितवन ११ फुटबल क्लबको आयोजनामा जारी प्रतियोगितामा शनिबार अन्तिम क्वाटरफाइनल खेल हुनेछ । चौथो तथा अन्तिम क्वाटरफाइनलमा सशस्त्र प्रहरी बल (एपिएफ) भण्डारा एफसी रड्स र गैंडाकोट एफसी भिड्नेछन् ।

चैत १० गतेसम्म चल्ने प्रतियोगिताको विजेताले ३ लाख ३ हजार र दोस्रो हुने टोलीले १ लाख ५० हजार रुपैयाँ प्राप्त गर्नेछ । भरतपुर भ्रमण वर्ष २०२४ को अवसरमा प्रतियोगिता आयोजना गरिएको हो ।