एजेन्सी – प्रशिक्षक योर्गन क्लपको अन्तिम सिजनको सुखद अन्त्य गर्ने आशामा रहेको लिभरपुलको उपाधि आकांक्षामा धक्का लागेको छ । पछिल्लो हप्ता म्यानचेस्टर युनाइटेड विरुद्ध बराबरी खेलेको लिभरपुल आज भने क्रिस्टल प्यालेस विरुद्ध पराजित भएको हो ।

क्रिस्टल प्यालेसले लिभरपुलकै घरेलु मैदानमा १-० को जित हासिल गरेको हो । प्यालेसको जितमा एबेरिचे एजेले खेलको १४औं मिनेटमा खेलको एकमात्र गोल गरे । टाईरिक मिचेलको क्रसमा एजेले बक्स भित्रबाट सहज गोल गर्दै प्यालेसलाई जित दिलाए ।

खेलमा लिभरपुलले थुप्रै मौकाहरु खेरा फालेको थियो । तर त्यसअघि खेलको १८औं मिनेटमा एन्ड्रयू रोबर्टसनले प्यालेसका जिन फिलिप मटेटाको प्रहार गोललाइनबाट क्लियर गरेका थिए ।

त्यसअघि खेलमा लिभरपुलले एक पछि अर्को मौका खेरा फाल्यो । २९औं मिनेटमा लुइस डीयाजको प्रहार प्यालेस गोलरक्षक डिन हेन्डर्सनले बचाए ।

हेन्डर्सनले ५५औं मिनेटमा डार्विन नुनेजको प्रहारलाई भने सहजै विफल पारे । ७३औं मिनेटमा डिएगो जोटाले किपर बिट भइसकेपछि पनि गोल गर्न सकेनन् । डोमिनिक सोबोज्सलाइको क्रसमा उनले बक्स भित्रबाट गरेको प्रहार नाथानियल क्लाइनले ब्लक गरे ।

७५औं मिनेट कर्टिस जोन्सले वान अन वान अवसर खेरा फाले । इन्ज्युरी समयमा जोटाको क्रहार टाईरिक मिचेलले ब्लक गरे ।

हार पछि तेस्रो स्थानमा रहेको लिभरपुलले पहिलो स्थानमा उक्लिने मौका गुमाएको छ । लिभरपुलको ३२ खेलमा ७१ अंक छ । पहिलो स्थानमा रहेको म्यानचेस्टर सिटीको ३२ खेलमा ७३ अंक छ । हाल दोस्रो रहेको आर्सनलको ३१ खेलमा ७१ अंक छ । आर्सनलले आज ९:१५ बजे एस्टन भिल्लाको सामना गर्नेछ ।

उता विजयी प्यालेस भने ३२ खेलमा ३३ अंक सहित १४औं छ ।