एजेन्सी – इंग्लिस फरवार्ड ह्यारी केनको कीर्तिमानी दुई गोलमा बायर्न म्युनिखले आइनट्राक्ट फ्रान्कफुर्टलाई पराजित गरेको छ । बायर्नले फ्रान्कफुर्टलाई २–१ ले पराजित गरेको हो ।

फ्रान्कफुर्ट विरुद्धको जितमा दुई गोल गरेसँगै केनले एक सिजनमा सर्वाधिक गोल गर्ने नयाँ व्यक्तिगत कीर्तिमान बनाएका छन् । ३० वर्षिय केनले बायर्नमा डेब्यु सिजनकाे सबै प्रतियोगितामा ४२ गोल गरिसकेका छन् ।

यसअघि उनले सन् २०१७–१८ को सिजनमा टोटेनहमबाट ४१ गोल गरेका थिए । यस्तै केनले क्लब र राष्ट्रका लागि ४ सय गोल गरिसकेका छन् ।

यस्तै केन १७ बुन्डेसलिगा टोलीमध्ये १६ टोलीविरुद्ध गोल गर्ने खेलाडी बनेका छन् । उनले १६ टोलीविरुद्ध गोल गर्ने गर्ड मुलर (१९६६–६७ र १९६९–७०), आइल्टन (२००३–०४) र रोबर्ट लेवान्डोस्की (२०१९–२० र २०२०–२१) सँगको संयुक्त कीर्तिमानलाई भेट्टाएका छन् ।

यस्तै केन डेब्यु सिजनमा सबै १७ पक्षहरूविरुद्ध गोल वा असिस्ट गर्ने पहिलो खेलाडी हुन् । केनले अक्टोबरमा फ्राइवर्गविरुद्ध गोल गर्न सकेनन् ।

इंग्ल्यान्डका कप्तान समेत रहेका केनले दोस्रो हाफमा घुँडामा चोट बोकेपनि खेललाई जारी राखेका थिए । केन बुन्डेसलिगामा तीन राउन्डको खेल बाँकी रहँदा लेवान्डोस्कीको ४१ गोलको कीर्तिमानभन्दा ६ गोलले पछि छ । केनले बुन्डेसलिगामा ३६ गोल गरिसकेका छन् ।

बुन्डेसलिगाको दोस्रो स्थानमा रहेको बायर्न च्याम्पियन बायर लेभरकुसेन भन्दा ११ अंकले पछि छ ।