काठमाडौं (हाम्रो खेलकुद)– अखिल नेपाल फुटबल संघ (एन्फा) ले नेपाली महिला राष्ट्रिय फुटबल टोलीका लागि दोस्रो चरणमा २५ खेलाडी छनोट गरेका छन् ।

मुख्य प्रशिक्षक राजेन्द्र तामाङले प्रारम्भिक चरणमा रहेका ३० खेलाडीबाट ५ खेलाडी कटौती गर्दै दोस्रो चरणमा २५ खेलाडी छनोट गरेका हुन् । प्रशिक्षणबाट सुशीला कुमारी चौधरी, सबिना चौधरी, गंगा गुरुङ, ममता पुन र मनमाया दमाई बाहिरिएका छन् ।

नेपाली टोलीले दुई साताअघिबाट सातदोबाटोस्थित एन्फा कम्प्लेक्सको खेल मैदानमा प्रशिक्षण गरिरहेका छन् । नेपालले लेबनानमा आयोजना हुने फोर नेसन्स कपसँगै नेपालमै आयोजना हुने साफ महिला च्याम्पियनसिपको लागि तयारी गरिरहेको छ ।

एन्फाले सहायक प्रशिक्षकमा भगवती थापा र गोलकिपिङ कोचमा विनोद महर्जनलाई नियुक्त गरेको छ । टिम व्यवस्थापकमा विन्द्रा देवान, टिम डक्टरमा डा. ज्योति राई र फिजियोमा नविना श्रेष्ठ वैद्य रहेका छन् ।

आउँदो अक्टोबरमा नेपालमा हुने साफ महिला च्याम्पियनसिपमा नेपाल समूह बी मा परेको छ । नेपालको समूहमा श्रीलंका, भुटान र माल्दिभ्स रहेका छन् । यस्तै समूह ए मा पाँच पटकको विजेता भारत, साविक विजेता बंगलादेश र पाकिस्तान रहेका छन् ।

साफ अक्टोबर १७ देखि ३० सम्म दशरथ रंगशालामा हुने तय छ । २०२२ मा भएको पछिल्लो संस्करण पनि नेपालले नै आयोजना गरेको थियो । सो संस्करणमा नेपाल फाइनलमा बंगलादेशसँग ३-१ ले पराजित भएकाे थियो ।

भारतले अहिलेसम्म पहिलो ५ संस्करण जितेको छ । भारतले नेपाललाई चार पटक र बंगलादेशलाई एकपटक फाइनलमा हराएको छ ।