काठमाडौं(हाम्रो खेलकुद) – चन्द्रपुर नगरपालिकालाई पराजित गर्दै वालिङ नगरपालिकाले एन्फा महिला लिगको दोस्रो चरणमा स्थान बनाएको छ ।

एन्फा कम्प्लेक्स सातदोबाटोमा बिहीवार भएको खेलमा चन्द्रपुरलाई वालिङले २-१ ले पराजित गरेको हो ।

दोस्रो चरणमा स्थान बनाउने चौथो टोली बन्ने क्रममा वालिङका लागि सुक्रिया मिया र ज्याकलिन नसालीले गोल गरिन् । चन्द्रपुरका लागि भने सुनिता सुनारले गोल गरिन् ।

खेलको छैटौं मिनेटमा गोल गर्दै सुक्रियाले वालिङलाई अग्रता दिलाईन् । ज्याकलिनले ३६औं मिनेटमा गोल गर्दै वालिङको अग्रता दोब्बरको बनाइन् ।

सुनिताले ५०औं मिनेटमा गोल गर्दै चन्द्रपुरलाई खेलमा फर्काउने कोसिस गरे पनि त्यो सम्भव हुन सकेन । वालिङको पहिलो चरणको समाप्तीमा ९ खेलबाट १५ भएको छ । समान खेलबाट चन्द्रपुरको भने ८ अंक भएको छ ।

आजनै हुने दोस्रो खेलमा कोशी प्रदेश र सुदूरपश्चिम प्रदेश खेल्दैछन् । खेल दिउँसो ३:३० बजे सातदोबाटोस्थित एन्फा कम्प्लेक्समा हुँदैछ ।

खराब प्रदर्शनका कारण अंकबिहीन रहँदै सुदूरपश्चिम पहिलो चरणबाटै बाहिरिसकेको छ । कोशी भने यस खेलमा जित निकाल्दै दोस्रो चरणमा पुग्ने योजनामा छ ।

कोशी ८ खेलमा ११ अंकका साथ पाँचौ स्थानमा छ । सुदूर भने अंकबिहीन रुपमा तालिकाको पुछारमा रहेको छ ।

यसअघि नै विभागीय टोलीहरु एपिएफ, आर्मी र नेपाल पुलिस दोस्रो चरणमा प्रवेश गरिसकेका छन् । अखिल नेपाल फुटबल संघ(एन्फा) को आयोजनामा जारी लिगमा १० टोलीको सहभागिता रहेको छ ।

सहभागी टोलीले पहिलो चरणमा एक अर्का विरुद्ध खेल्नेछन् । पहिलो चरणमा शीर्ष ५ मा रहने टोली दोस्रो चरणका लागि छनोट हुनेछ ।