काठमाडौं (हाम्रो खेलकुद) – साफ महिला च्याम्पियनसिप २०२४ अन्तर्गत समूह ए को अन्तिम खेलमा साविक विजेता बंगलादेशले भारतविरुद्ध पहिलो हाफमै ३ गोल गरेको छ ।

दशरथ रंगशालामा जारी खेलको पहिलो हाफमा बंगलादेश ३-१ ले अघि छ । साविक विजेता टोलीका लागि तोहुरा खातुनले २ तथा अफिदा खान्दाकरले गोल गरे । पहिलो हाफको अन्त्यतिर बाला देवीले भारतका लागि गोल फर्काइन् ।

भारतले खेलमा अवसर पाएपनि त्यसको सदुपयोग गर्न नसक्दा बंगलादेशले फाइदा उठायो । बंगलादेशले त्यसपछि दुवै गोल भारतीय गोलरक्षकको कमजोरीमा गर्यो । तोहुराले अन्त्यतिर सुन्दर गोल गर्दै खेलमा ३-० ले अग्रता दिलाएपनि त्यसै गोलमा चलेको किकअफबाट भारतले गोल फर्कायो ।

बङ्गलादेशले १८औं मिनेटमा अग्रता बनायो । कप्तान सविना खातुनको कर्नरमा भारतीय गोलरक्षक पान्थोइ चानुको फितलो पन्च अफिदा खान्दाकर नजिकै ड्रप भयो । सो बललाई अफिदाले सुन्दर ढङ्गले गोलकिपरको माथिबाट गोल पोष्टको दिशा दिइन् ।

२७ औं मिनेटमा ऋतु पूर्णा चक्माले पेनाल्टी क्षेत्रको बायाँ तर्फबाट गरेको क्रस पोस्टमा लागेर फर्कंदा बंगलादेश अग्रता दोब्बर पार्नबाट चुक्यो ।

२९ औं मिनेटमा बंगलादेशले अग्रता दोब्बर पार्यो । बायाँ विंगबाट ऋतुको क्रसमा गोलरक्षक पान्थोइ चानुले बल रोक्न नसक्दा तोहुराले गोल गरिन् । फार पोस्टमा रन्जना चानुले मार्क गरेको भएपनि तोहुराले ६ यार्ड बक्स भित्रबाट गोलको दिशा दिएकी थिइन् ।

३५ औं मिनेटमा भारतले खेलमा फर्कन सुवर्ण अवसर खेर फाल्यो । बायाँ विंगबाट रन्जना चानुले दिएको लो क्रस पेनाल्टी क्षेत्रभित्र बाला देवीले पाएकी थिइन् । कुनै डिफेन्डर वरपर नरहेको अवस्थामा ६ यार्ड बक्स नजिकबाट उनले गरेको प्रहार गोलरक्षक रुपना चक्माले विफल पारिन् ।

३८ औं मिनेटमा भारतको पुनरागमनमा पोस्ट बाधक बन्यो । मनिषाले पेनाल्टी क्षेत्रको ठिक बाहिरबाट गरेको फ्रिकिकमा गोलरक्षक बिट भएपनि पोस्टमा लागेर फर्कियो ।

४३ औं मिनेटमा बंगलादेशले तोहुराको उत्कृष्ट गोलमा ३-० को अग्रता लियो । साम्सुनाहरले पेनाल्टी क्षेत्र नजिकबाट दिएको पासलाई तोहुराले हाफ भलीमा सट लिँदै सुन्दर गोल गरिन् ।

त्यसको एक मिनेट नबित्दै भारतले गोल फर्कायो । डालीमा छिब्बरले दायाँ विंगबाट दिएको क्रस रुपना चक्माको हातबाट फुस्किएपछि बाला देवीले बललाई भुइंमा खस्न नदिई पोस्टतर्फ पठाइन् ।

आजको खेलमा बंगलादेशले जित हासिल गरे समूह विजेता बन्नेछ । बराबरीले भने भारत समूह विजेता बन्न पर्याप्त हुनेछ ।