काठमाडौं(हाम्रो खेलकुद) – कप्तान धर्वेन्द्र कुँवरको ह्याट्रिकको सहयोगमा जावलाखेल युथ क्लबले ललित स्मृति एन्फा यु १८ युथ लिगमा सहज जित दर्ता गरेको छ ।

सातदोबाटोस्थित अखिल नेपाल फुटबल संघ (एन्फा) कम्प्लेक्समा आइतवार जावलाखेलले सातदोबाटो युथ क्लबविरुद्ध ४-१ को जित हासिल गरेको हो ।

जावलाखेलका लागि अर्को गोल प्रशान्त तामाङले गरे । सातदोबाटोका लागि निसप्रकाश बरालले गोल गरे।

३८ औं मिनेटमा निसप्रकाशको गोलमा सातदोबाटोले सुरुवाती अग्रता लियो । धर्वेन्द्रले ५०औं मिनेटमा गोल गर्दै जावलाखेललाई बराबरीमा ल्याए । पहिलो गोल भएको पाँच मिनेटपछि नै प्रशान्तले गोल गर्दै जावलाखेललाई २-१ को अवस्थामा पुर्याए ।

६९औं मिनेटमा धर्वेन्द्रले व्यक्तिगत दोस्रो तथा टोलीका लागि तेस्रो गोल गरे । ८४औं मिनेटमा धर्वेन्द्रले ह्याट्रिक पूरा गर्दै जावलाखेललाई ४-१ को सहज जित दिलाए । जितसँगै १० खेलमा १४ अंक जोडेको जावलाखेल छैटौं स्थानमा उक्लिएको छ । सातदोबाटो समान खेलबाट ४ अंकका साथ ११औं स्थानमा छ ।

दिनको पहिलो खेलमा न्युरोड टिम (एनआरटी) ले नेपाल पुलिस क्लबविरुद्ध सहज जित दर्ता गरेको थियो ।

एनआरटीले पुलिसलाई ४-२ ले हरायो । एनआरटीलाई जित दिलाउन इशान शाहले २ गोल गर्दा सन्तोष गोङ्बा र विज्ञान खड्काले समान १ गोल गरे । पुलिसका लागि दुवै गोल साजन राज गौतमले गरे ।

सन्तोषले खेलको छैटौं मिनेटमै गोल गर्दै एनआरटीलाई सुरुवाती अग्रता दिलाए । ११औं मिनेटमा साजनले पुलिसका लागि गोल गर्दै खेल बराबरीमा ल्याए । १८औं मिनेटमा साजनले व्यक्तिगत दोस्रो गोल गर्दा पुलिसले अग्रता लियो ।

इशान र विज्ञानको गोलमा एनआरटीले पहिलो हाफमा ३-१ को अग्रता लिएको थियो । ५२औं मिनेटमा इशानले दोस्रो गोल गर्दै एनआरटीलाई ४-२ मा पुर्याए ।

जितसँगै १० खेलमा एनआरटीले १९ अंक जोडेको छ । शीर्ष स्थानमा यथावत पुलिसको समान खेलबाट २३ अंक छ ।