काठमाडौं (हाम्रो खेलकुद)- फुटबलर्स मिसन टुगेदर र ब्लुक्रस अस्पताल बिच स्वास्थ्य सेवामा छुट दिने सम्बन्धि सम्झौता भएको छ ।

फुटबलर्स मिसन टुगेदरका वरिष्ठ उपाध्यक्ष भिक्टर जे.बि. राणा र ब्लुक्रस कार्यकारी व्यवस्थापन समितिका सदस्य सचिव रजत श्रेष्ठले मंगलवार सम्झौता पत्रमा हस्ताक्षर गरे। सम्झौता ५ वर्षको रहेको बताइएको छ।

मिसन टुगेदरमा आवद्ध पूर्व फुटबल खेलाडी , प्रशिक्षक, रेफ्री, अफिसियल तथा उनीहरु परिवारले स्वास्थ्य परिक्षण, ल्याव टेष्ट, दुर्घटना भई उपचार (स्वास्थ्य उपचार) गराउदा २० प्रतिशत छुट प्राप्त गर्नेछन् ।

मिसन टुगेदरले गर्ने प्रतियोगितामा निशुल्क एम्बुलेन्स र चिकित्सकीय सेवा प्रदान गर्नेछ। मेजर र माईनर अपरेसन गर्दा समेत विशेष छुट दिने व्यवस्था सम्झौतामा उल्लेख छ ।

टुगेदरका वरिष्ठ उपाध्यक्ष राणाले हाम्रो प्रस्तावलाई स्वीकार गरि खेलाडीलाई सम्मान व्यक्त गरेकोमा अस्पताल व्यवस्थापन प्रति धन्यवाद दिए । अस्पतालका व्यवस्थापन समितिका सदस्य श्रेष्ठले सहकार्य गर्न पाएकोमा खुसी व्यक्त गरे ।

सो अवसरमा मिसन टुगेदरका महासचिव धिरेन्द्र प्रधान, कोषाध्यक्ष वसन्त लामा, पूर्व अन्तर्राष्ट्रिय महिला तथा पुरुष खेलाडीहरुको उपस्थिति थियो ।

अस्पतालको तर्फबाट व्यवस्थापन समितिका प्रशासन र वित्त विभागका निर्देशक सति गौतम सिंह लगायत अस्पताल व्यवस्थापनको उच्च व्यवस्थापकहरुको उपस्थिति रहेको थियो ।