काठमाडौं (हाम्रो खेलकुद) – अखिल नेपाल फुटबल संघ (एन्फा) ले एन्फा महिला लिग अन्तर्गत प्लेअफ चरणको खेलहरुको समय पुन: परिवर्तन गरेको छ ।

यसअघि एन्फाले अन्तिम चरणको खेल तालिका सार्वजनिक गर्दा प्लेअफ चरणका सम्पूर्ण खेलहरु दशरथ रंगशालामा गर्ने सार्वजनिक गरेको थियो । प्लेअफका सबै खेल दिउँसो २ बजे गर्ने एन्फाले तोकेको थियो ।

तर दशरथ रंगशालामा सभापति कप आयोजना हुने भएसँगै एन्फाले महिला लिगको खेल तालिकामा हेरफेर गरेको हो । सभापति कप माघ १० देखि १७ सम्म दशरथ रंगशालामा हुने तालिका महिला लिग चल्दै गर्दा सार्वजनिक भएको थियो ।

एन्फाले नयाँ तालिका अनुसार एलिमिनेटरको खेल माघ ११ गते शुक्रबार एन्फा कम्प्लेक्समै दिउँसो २:४५ बजे गर्ने भएको छ । एलिमिनेटरमा नेपाल पुलिस क्लब र बागमती युथ क्लब खेल्दैछन् ।

त्यस्तै क्वालिफायरका खेलहरु दशरथ रंगशालामा विहान १० बजे हुने एन्फाले नयाँ तालिकामा उल्लेख गरेको छ । दिउँसोको समयमा सभापति कपका खेल हुने भएकाले एन्फाले यो निर्णय गरेको हो ।

पहिलो क्वालिफायरमा माघ १२ गते शनिबार एपिएफ र आर्मी खेल्नेछन् । माघ १४ गते सोमबार दोस्रो क्वालिफायर हुनेछ ।

फाइनल भने पूर्व निर्धारित समय अनुसार नै दशरथ रंगशालामा माघ १६ गते दिउँसो २ बजे हुनेछ । उक्त दिन सभापति कपमा कुनै खेल नभएकाले यस तालिका भने परिवर्तन भएको छैन ।