विराटनगर (हाम्रो खेलकुद)- विभागीय टोली नेपाल पुलिस क्लब विराटनगरमा जारी नवौं संस्करणको रमपम विराट गोल्डकपको सेमिफाइनलमा पुगेको छ ।

विराटनगरको सहिद रंगशालामा बिहीवार भएको दोस्रो क्वाटरफाइनल खेलमा  साविक विजेता समेत रहेको अर्को विभागीय टोली एपीएफ एफसीलाई २-० गोलले पराजित गर्दै अन्तिम चारमा पुगेको हो । पुलिसका अरुण गाहा र मनिष सेढाईले गोल गरे ।

उज्वल राईले ६६ औं मिनेटमा निकालिदिएको क्रसमा अरुणले हेडर गोल गरे । खेल सकिन ३ मिनेट बाँकी रहँदा मनिषले गोल गर्दैै टोलीको जित निश्चित गरे ।

एपिएफका बुद्धीमान राईले खेलको १५ औं  मिनेटमा पाएको सुन्दर गोल गर्ने अवसर खेर फाले । दिपेश धिमालले निकालेको पासलाई बुद्धिमानले प्रहार गरेको वान भर्सेस वानको प्रहार बाहिरयो ।

२० औं मिनेटमा एपिएफका कप्तान हरी कार्कीको डिबक्स नजिक देखिको प्रहार बाहिरदा पहिलो हाफमा गोल गर्ने अवसर खेर गयो ।

३८ औं मिनेटमा एपिएफका एलिक श्रेष्ठले करिव ३० यार्डदेखि गरेको प्रहार पुलिसका गोलकिपर अमित तामाङले पन्च गर्दै रोके।

७० औं मिनेटमा एन्जल श्रेष्ठले गरेको प्रहार बाहिरिदा बराबरी गोल फर्काउनबाट चुक्यो । ७५ औं मिनेटमा विश्वास उदासले वान भर्सेस वानको स्थितिमा गरेको प्रहारमा पोस्ट माथिबाट बाहिरयो ।

पुलिस मनिष प्लेयर अफ दि म्याच घोषित भए र ११ हजार रुपैयाँ प्राप्त गरे। भारत दिल्लीको सुदेवा फुटबल क्लबलाई हराउँदै क्वाटरफाइनलमा पुगेको थियो ।

प्रतियोगिताको तेस्रो क्वाटरफाइनल शुक्रवार थ्री स्टार र मछिन्द्र फुटबल क्लब बिच हुनेछ ।