एजेन्सी – स्पेनिश ला लिग अन्तर्गत पछिल्लो पाँच खेलमा जित दर्ता गर्दै लयमा फर्किएको संकेत दिइरहेको बार्सिलोनाले क्याम्प नोमा सेल्टा भिगोको सामना गर्दैछ। बार्सिलोनाले २५ खेलबाट ५७ अंक जोडेको छ भने सेल्टा २४ खेलबाट ३५ अंक जोड्दै लिगको १०औं स्थानमा रहेको छ।
सेल्टासंगको पछिल्लो भेटमा बार्सिलोना ४-३ले पराजित भएको थियो। उक्त खेलमा बार्सिलोना एक समय ३-०ले पछि रहेपनि खेलको अन्त्यतिर बार्साले ३ गोल फर्काएको थियो। सेल्टा र बार्सिलोनाबिचको पछिल्लो ६ खेलमा दुवैले समान ३/३ जित दर्ता गरेका छन्।
सेल्टाले आफ्नो पछिल्लो २ लिग खेल बराबरीमा टुंग्याएको छ भने बार्सिलोनाले स्पोर्टिङ्ग गिहोनलाइ ६-१ले पराजित गर्दै उत्कृष्ट फर्ममा रहेको प्रष्ट्याएको छ। खेल नेपाली समयानुसार आइतबार विहान १:३० बजे सुरु हुनेछ।
