काठमाडौं (हाम्रो खेलकुद)- थ्री स्टार क्लबका निवर्तमान अध्यक्ष अरुणमान जोशीले अखिल नेपाल फुटबल संघ (एन्फा) को सहायक महासचिव पदबाट बुधवार राजीनामा दिएका छन्।

एन्फाको अपिल कमिटीले असार ५ गते थ्री स्टारका बारेमा लिएको पछिल्लो निर्णय अन्यायपूर्ण भएको उल्लेख गर्दै पदमा बसिरहन उपयुक्त नभएकोले राजीनामा दिएको जोशीले बताएका छन् ।

जोशीले आज बिहान इमेलमार्फत राजीनामा पठाएको र आजै सातदोबाटोस्थित एन्फाको कार्यालयमा भौतिक रुपमा दर्ता गर्ने जानकारी दिएका छन्।

२०८० जेठ २८ गते सम्पन्न ए डिभिजन लिग अन्तर्गत जावलाखेल युथ क्लबसँगको अन्तिम खेलमा थ्री स्टारले भिसाको म्याद सकिएको दुई विदेशी खेलाडी खेलाएको भन्दै १-० ले जितेको खेललाई एन्फाबाट उल्टाउने निर्णय भएको भन्ने जानकारी प्राप्त भएको उल्लेख गर्दै राजीनामा पत्रमा उनले भनेका छन्,
‘ नेपाल एपिएफ क्लबको उजुरीको आधारमा कारवाही गरेर त्यो खेल जावलाखेललाई ३-० ले जितेको भनिएको छ। त्यसबाट एपिएफको ए डिभिजन हैसियत जोगिएको र थ्री स्टार बी डिभिजनमा घटुवा भएको छ। यसअघि अनुशासन समितिले ती दुई खेलाडी र क्लबलाई समेत जरिवाना गर्ने निर्णय गरेको थियो। एउटा घटनामा पटक पटक कारवाहीको निर्णय गर्न मिल्छ? ‘

‘ढिलो न्याय दिनु भनेको न्याय नदिनु हो’ भन्ने उदाहरणलाई एन्फाले फेरि एक पटक प्रमाणित गरेको भन्दै जोशीले प्रश्न गरेका छन्, पछिल्लो निर्णय लिनका लागि एन्फाको अपिल कमिटीलाई २ वर्ष भन्दा लामो समय किन लिग्यो ? शंका गर्ने पर्याप्त ठाउँ छ । एन्फाका तत्कालीन फिफा कनेक्ट अफिसरका अनुसार ती दुई विदेशी खेलाडीलाई जावलाखेलसँगको त्यो खेलमा खेल्न दिनु भनेर सचिवालयबाटै निर्देशन दिइएको थियो । के आधारमा त्यो निर्देशन दिइयो ? आफैले दिएको निर्देशनबाट एन्फा सचिवालय पछि कसरी हट्न सक्छ ? कुनै पनि दुई टोलीबीचको खेलको विषयमा तेस्रो क्लबले उजुरी दिन मिल्छ भन्ने लिग सञ्चालन नियमावलीमा उल्लेख छैन । त्यो खेलमा संलग्न नभएको एपिएफको उजुरीलाई एन्फाले के आधारमा स्वीकार गर्यो ।

उनले एन्फाले ए, बि,सी डिभिजनका बारेमा लिएका पछिल्ला निर्णय विवादस्पद रहँदै आएको‌ आरोप समेत लगाएका छन् । उनले भनेका छन,’ एन्फाको सहायक महासचिवका रुपमा मैले पनि त्यो नजिकबाट महसुस गरेको छु। र एन्फाले फुटबलको भावना, मर्म र नियमविपरीत लिएका कतिपय अन्यायपूर्ण कदमबाट मैले आफूलाई अलग राखेको छु। ‘

थ्री स्टारको अध्यक्ष रहेकै अवस्थामा एन्फाको सहायक महासचिवको जिम्मेवारी लिएको स्मरण गर्दै जोशीले थपेका छन् ,’ २०७९/०८० को लिग हुँदा म थ्री स्टारको अध्यक्ष थिए । तर, एन्फाले थ्री स्टारमाथि नै पूर्वाग्रह राखेर अन्याय गरेको छ । क्लबको प्रतिनिधित्व गर्दै एन्फामा जिम्मेवारी सम्हालेको‌ मलाई आफ्नै क्लबमाथिको कारवाही पछि नैतिकताका आधारमा पनि सहायक महासचिवको पदमा बसिराख्न उपयुक्त लागेन ।’

थ्री स्टारले भविष्यमा लिने सबै खाले कदममा आफ्नो उपस्थिति र समर्थन रहने पनि‌ जोशीले प्रस्ट पारेको छन् । पंकज विक्रम नेम्वाङ अध्यक्षमा निर्वाचित भएपछि जोशी, वसन्त अर्याल र दामोदर भट्टराईसँगै ३ जना सहायक महासचिव नियुक्त भएका थिए। अर्यालको सट्टापछि एन्फाले विजय घलेलाई सो पदमा नियुक्त गरेको थियो।