काठमाडौं (हाम्रो खेलकुद)- नेपाली राष्ट्रिय महिला टोलीको बिदाइ समारोहमा अखिल नेपाल फुटबल संघ (एन्फा) का अध्यक्ष पंकज विक्रम नेम्वाङले अहिलेको टोलीले विश्व कप खेल्नेमा ढुक्क रहेको बताएका थिए।

नेम्वाङले विदेशी प्रशिक्षक नियुक्त गरिएको र यो पटक नेपालले एसियन कपमा छनोट हुनेमा प्रशिक्षक माथि एन्फाले विश्वास गरेको बताएका थिए ।

एन्फा नेतृत्वको विश्वासका बीच नवनियुक्त प्रशिक्षक प्याट्रिक डि वाइल्डले राष्ट्रिय टोलीबाट आज डेब्यु गर्देछन्। डेब्यु खेलमा नै उनलाई उत्कृष्ट नतिजा निकाल्ने दबाब पनि छ।

प्याट्रिक नेपाली फुटबलमा नयाँ नाम होइन। उनी नेपाल सुपर लिग दौरान पहिलो पटक नेपाली फुटबलसँग जोडिएका थिए। उनले काठमाडौ रेजर्सको नेतृत्व उनले गरेका थिए। यसपछि उनले नेपाली महिला राष्ट्रिय फुटबल टोलीको जिम्मेवारी पाएका छन्।

महिला टोलीले प्रो लाइसेन्स प्रशिक्षक पाएको यो पहिलो पटक हो। तर प्याट्रिकले‌ नेपाली टोलीसँग मात्र तीन साता बिताएका छन्। उनी युइएफए प्रो लाइसेन्स प्रशिक्षक हुन्। उनीसँग विभिन्न क्लबहरू र उमेर समुहको राष्ट्रिय टोलीको सहायक प्रशिक्षकको अनुभव थुप्रै छ।

तर उनले कुनै पनि राष्ट्रिय टोलीको प्रशिक्षकको जिम्मेवारी सम्हालेको यो पहिलो पटक हो।
त्यसैले उनलाई पहिलो पटक राष्ट्रिय टोलीको प्रशिक्षकको रुपमा डेब्यु गर्दै गर्दा उत्कृष्ट नतिजा निकाल्ने दबाब र चुनौती दुवै रहेको छ।

उनले नेपाली टोली र खेलाडी प्रति विश्वास रहेको र टिम भएर खेल्दा नतिजा आउने बताएका छन्। उनले विदेशी लिग खेलेका ४ खेलाडी पनि टिममा रहेकोले टोली मजबुत रहेको बताएका छन्।

नेपालले आज साँझ लाओससँग खेल्दै गर्दा प्रशिक्षकको डेब्यु र नेपालले खेल्ने एक सयौं खेलको संयोग पनि परेको छ। केहि दिन अगाडि उज्वेकिस्तान पुगेको टोलीले तयारी पनि गरेको छ। तर प्रशिक्षक प्याट्रिकले टोलीको कप्तानको जिम्मेवारी भने अझै तोकेका छैनन्।

नियमित कप्तान एन्जिला तुम्बाप्पो सुब्बालाई नेतृत्व दिने वा नयाँलाई जिम्मेवारी दिने आज खेल अघि थाहा हुनेछ ।‌ नेपाल र लाओस पहिलो पटक महिला फुटबलमा भिड्न लागेका हुन्।