काठमाडौं (हाम्रो खेलकुद)- एएफसी महिला एसियन कप छनोट अन्तर्गत श्रीलंका विरुद्धको पहिलो हाफमा नेपालले ४-० को अग्रता बनाएको छ।

कप्तान सावित्रा भण्डारी (साम्बा) ले ह्याट्रिक पूरा गर्दा गिता रानाले १ गोल गरिन् । उज्वेकिस्तानमा जारी खेलको सुरुवातमा नै नेपालले अग्रता बनायो। अनिता बस्नेतको कर्नरमा गिताको हेडरले सही दिशा लियो।

नेपालले खेलको २० औं मिनेटमा अग्रता दुगुना गर्यो। समिक्षा घिमिरेको क्रसमा श्रीलंकाकी गोलकिपर साकुरा सेबान्डीले पन्च गरेको बल अनिताले साम्बालाई दिइन्। साम्बाले बक्स भित्रबाट गोल गरिन्।

२६ औं मिनेटमा प्रीति राईको लङ रेन्ज प्रहारलाई श्रीलंकाकी गोल किपरले साकुरा सेबान्डीले बचाइन्। यसपछि खेलको ३१ औं मिनेटमा साविता राना मगरको क्रस बारमा लागेर फर्कियो।

खेलको ३६ औं मिनेटमा कप्तान साम्बाले फ्रि-किकमा सिधै गोल गरिन्। तर रेफ्रीले गोल दिएनन्। यसपछि ४२ औं मिनेटमा रश्मिकुमारी घिसिङको कट ब्याकमा बक्स भित्रबाट साम्बाको उत्कृष्ट भलि गोलमा परिणत भयो।

पहिलो हाफको इन्ज्युरी समयको पहिलो मिनेटमा साम्बाले ह्याट्रिक पूरा गरिन्। सविताको क्रसमा साम्बाको हेडरले सही दिशा लियो। ६० औं खेलमा साम्बाको त्यो ६४ औं गोल हो।

नेपालले पहिलो खेलमा लाओसलाई ९-० ले हराएको थियो। श्रीलंका पहिलो खेलमा घरेलु टोली उज्वेकिस्तानसँग १०-० को फराकिलो अन्तरमा हारेको थियो।

श्रीलंका विरूद्ध नेपाल अहिलेसम्म अपराजित छ। यसअघि ८ पटक खेल्दा नेपालले श्रीलंकालाई सबैमा हताएको इतिहास छ।

फिफा वरियतामा नेपाल श्रीलंका भन्दा ५९ स्थान माथि छ। नेपाल एक सयौं र श्रीलंका १ सय ५९ औं स्थानमा छ।