काठमाडौं (हाम्रो खेलकुद)- राष्ट्रिय महिला फुटबल टोली सोमवार बिहान स्वदेश आइपुग्ने भएको छ।

उज्वेकिस्तानमा एएफसी महिला एसियन कप छनोट चरण खेलेर नेपाली टोली फर्कन लागेको हो ।

अखिल नेपाल फुटबल संघ (एन्फा) का अनुसार टोली भोलि बिहान ८ बजे एयर अरेबियाबाट त्रिभुवन अन्तर्राष्ट्रिय विमानस्थलमा आइपुग्नेछ।‌ टोली उज्वेकिस्तानबाट आजै नेपालका लागि निस्केको हो।

तेस्रो तथा अन्तिम खेलमा उज्वेकिस्तानसँग पेनाल्टी सुटआउटमा ४-२ ले पराजित भएपछि नेपालको छनोट यात्रा टुंगिएको थियो।

पहिलो हाफमा ३-१ ले पछि परेको अवस्थाबाट नेपाल निर्धारित ९० मिनेटमा नेपाल ३-३ को बराबरी गर्न सफल भएको थियो।

कप्तान सावित्रा भण्डारी ‘साम्बा’ ले पहिलो हाफमा एक गोल गर्दै टोलीलाई खेलमा फर्काउने संकेत गरेकी थिइन्। दोस्रो हाफमा १ मिनेटको फरर्कमा गोल गर्दै नेपालले खेलमा पुनरागमन गरेको थियो। ७१ औं मिनेटमा गीता रानाले गोल गरेको अर्को मिनेटमा साम्बाले बराबरी गोल फर्काएकी थिइन् ।

तर, पेनाल्टी सुटआउटमा नेपाली टोली अभागी रह्यो। पहिलो खेलमा लाओसलाई ९-० र दोस्रो खेलमा श्रीलंकालाई ८-० ले हराउँदै छनोटमा नेपालले बलियो दाबेदारी प्रस्तुत गरेको थियो। दुर्भाग्य यो पटक पनि टोलीलाई सफलता मिलेन।

समूह ‘एफ’ बाट उज्वेकिस्तान अर्को वर्ष अस्ट्रेलियामा हुने एसियन कपका लागि छनोट भयो।