काठमाडौं (हाम्रो खेलकुद)- विश्व फुटबल महासंघ (फिफा) ले अखिल नेपाल फुटबल संघ (एन्फा) माथि ४ वर्ष भन्दा लामो समयदेखि लगाएको कन्ट्रोल फन्डिङ हटाएको छ।

फिफाको गभर्नेन्स,अडिट एन्ड कम्ल्लाइन्स कमिटी (जिएसिसी) को बिहीवार (जुलाई १०) को निर्णयबाट कन्ट्रोल फन्डिङ हटाईएको फिफाको पत्र प्राप्त भएको एन्फाले शनिवार प्रेस विज्ञप्ति मार्फत जानकारी दिएको छ । सन् २०२१ को मार्च १५ देखि फिफाले एन्फामाथि कन्ट्रोल फन्डिङ लगाएको थियो।

‘एन्फा पूर्णरुपमा आर्थिक सुशासन, पारदर्शिता र भ्रष्टचार मुक्त संघमा रुपान्तरण हुनुले अध्यक्ष पंकज विक्रम नेम्वाङको नेतृत्वको कार्यसमितिले गरेको प्रतिबद्धता पूरा भएको पुष्टि गर्दछ, महासचिव किरण राईले जारी गरेको विज्ञप्तिमा भनिएको छ, कार्यसमिति पदाधिकारी तथा सदस्यहरु एवम् सचिवालयको निरन्तरको प्रयास तथा सम्पूर्ण संघमा आवद्ध सदस्य संस्थाहरुको सहयोग र समन्वयको सामुहिक तथा संगठित प्रयासबाट आज सकारात्मक परिणाम हासिल भएको छ ।’

दुई पेजको विज्ञप्तिमा अगाडि भनिएको छ,’ संघका अध्यक्ष श्री पंजक विक्रम नेम्वाङ्गको नेतृत्वको कार्यसमिति र सचिवालयले इमान्दारीता पूर्वक कार्य सम्पन्न गरिरहँदा विभिन्न प्रकारका गलत प्रवृतिहरु, नेपाली फुटबल खेलको विकास, प्रगती र सफलता नचाहाने पझर्वग्राही र स्वार्थी समूहहरुबाट फुटबल खेल विकासका कामहरुमा गरेका विभिन्न प्रकारका अवरोधहरु, दैनिक कुप्रचार, भ्रम र नेपाली फुटबल खेल माथि भैरहेको प्रहारलाई कामबाटै जवाफ दिईएकोछ ।’

संघ मुख्यत फिफा र ए.एफ.सी. को आर्थिक अनुदानबाट सञ्चालन हुने गर्दछ । तसर्थ दुवै अन्तराष्ट्रिय आबद्धता प्राप्त संस्थाहरुबाट भएको प्रत्यक्ष अनुगमन, लेखा परिक्षण र चेक जाँचहरु पश्चात भएको उल्लेखित निर्णयहरुले एन्फामा आर्थिक पारदर्शीता र सुशासन कायम रहेको प्रमाणित भएको छ, विज्ञप्तिमा भनिएको छ।