काठमाडौं (हाम्रो खेलकुद) – एन्फा यु-१६ युथ लिगमा सातदोबाटो युथ क्लबको पोस्टमा मछिन्द्र क्लबले दर्जन गोल गरेको छ ।

एन्फा कम्प्लेक्स सातदोबाटोमा भएको आइतवारको दोस्रो खेलमा मछिन्द्रले सातदोबाटोलाई १२-१ को फराकिलो अन्तरले पराजित गरेको छ ।

चौथो खेलमा तेस्रो जित दर्ता गर्ने क्रममा मछिन्द्रका लागि विकास थापाले ह्याट्रिक गरे । राहुल कुमार योञ्जन र गोविन्द विकले समान २, कोञ्जोक लामा, सौगात मगर, किरण धामी, सुमन बम ठकुरी र जनक विकले समान १ गोल गरे । सातदोबाटोका लागि युवराज भट्टराईले सान्त्वना गोल गरे ।

जनकले तेस्रो मिनेटमा मछिन्द्रका लागि गोल गरे । विकासले सातौं, १५औं र ४१औं मिनेटमा गोल गरे । सुमनले १७औं र किरणले २१औं मिनेटमा गोल गरे । राहुलले २६औं र २१औं मिनेटमा तथा गोविन्दले ६१औं र इन्ज्युरी समयमा गोल गरे ।

कोञ्जोकले ६५औं र सौगातले ७५औं मिनेटमा गोल गरे । सातदोबाटोका लागि युवराजले ५२औं मिनेटमा गोल फर्काए । जितसँगै मछिन्द्र ४ खेलमा १० अंकमा रहेको छ । सातदोबाटोको यो लगातार चौथो हार हो ।

आजै भएको अर्को खेलमा हिमालयन शेर्पा क्लब र न्युरोड टिम एनआरटी ३-३ को बराबरीमा रोकिएका छन् । हिमालयनका लागि अभी राईले २ र आकाश मोक्तानले १ गोल गरे । एनआरटीका लागि भने रितिक फडिराले २ र निरञ्जन दुलालले १ गोल गरे ।

बराबरीसँगै हिमालयनको ७ र एनआरटीको ४ अंक भएको छ । आजै भएको पहिलो खेलमा जावलाखेल युथ क्लबले श्री भगवती क्लबलाई पराजित गरेको थियो ।