नेपालगञ्ज (हाम्रो खेलकुद)– टुबोर्ग नेपालगञ्ज गोल्ड कप फुटबल प्रतियोगिताको दोस्रो क्वार्टरफाइनलमा आज विभागिय टोली नेपाल पुलिस क्लब र आयोजक नेपालगञ्ज ११ बीच प्रतिस्पर्धा हुँदैछ । यसै महिना धरानमा १९ औं बुढासुब्बा गोल्डकप फुटबल प्रतियोगिताको उपाधि जितेको पुलिस त्यसपछि १९ औं तिलोत्तमा गोल्ड कपको क्वार्टरफाइनलमा अर्को विभागिय टोली त्रिभुवन आर्मी क्लबसँग पराजित भएको थियो । त्यसयता पुलिस पहिलो पटक मैदान उत्रदैछ ।

फाइल फोटो

प्रतियोगिताको पहिलो दिन सुदूरपश्चिमाञ्चल ११ विजयी हुँदै सेमिफाइनल पुगिसकेको छ । सुदूरपश्चिमाञ्चलले भारतको दिल्ली युनाइटेडलाई १–० ले हराएको थियो । चैत ४ गते हुने फाइनलको विजेताले उपाधि सहित ५ लाख र दोस्रो हुने टोलीले २ लाख ५१ हजार रुपैयाँ प्राप्त गर्नेछन् । प्रतियोगिता अवधिभर खेलाडी, रेफ्री, अफिसियलको दुर्घटना विमा एनएलजी इन्सुरेन्स कम्पनी लिमिटेडले गरेको छ ।

प्रतियोगितामा एन्फा, युवा तथाा खेलकुद मन्त्रालय, मध्यपश्चिमाञ्चल खेलकुद विकास समिति, बाँके जिल्ला खेलकुद विकास समितिको सहकार्य रहेको छ । नेपालगञ्ज रंगशालामा हुने प्रतियोगिताको क्वार्टरफाइनल खेलेको टिकटदर १ सय तथा सेमिफाइनल र फाइनलको टिकटदर २ सय तोकिएको आयोजक बाँके जिल्ला फुटबल संघले जनाएको छ ।