काठमाडौं (हाम्रो खेलकुद)- नेपालले एएफसी एसियन कप छनोटको तेस्रो चरण अन्तर्गत आज भियतनामको सामना गर्दैछ। तुलनात्मक रूपमा बलियो प्रतिद्वन्द्वी भियतनाम विरूद्ध नेपाल २२ वर्षपछि खेल्दैछ।

सन् २००४ को एसियन कप छनोटमा नेपालले भियतनामसँग दुई खेल खेलेको थियो। त्यति बेला नेपाल पहिलो खेलमा ५-० र दोस्रो खेलमा २-० पराजित भएको थियो।

नेपाली टोलीलाई जितको खुसी दिने दबाब पनि छ। नेपालले पछिल्ला १० अन्तर्राष्ट्रिय खेलमा मात्र २ खेलमा जित निकालेको छ। ३ मा हार र २ बराबरी गरेको छ। पछिल्लो मैत्रीपूर्ण खेलमा नेपाल बंगलादेशसँग गोल रहित बराबरी खेलेको थियो।

नेपाली टोली जितको दबाबमा छ। तर धेरै अपेक्षा गर्ने वातावरण पनि छैन । सहिद स्मारक ‘ए’ डिभिजन लिग पछिल्लो पटक सकिएको आज ८ सय ५१ दिन भएको छ।

खेलाडीले निरन्तर फुटबल खेल्न पाएका छैनन्। यो अवस्थामा नेपालभन्दा ६२ स्थान माथि रहेको भियतनाम विरूद्ध ठूलो अपेक्षा गर्ने ठाउँ छैन । तर नेपाली टोली सक्दो प्रयास गर्ने बताएको छ।

छनोटको तेस्रो खेलमा पहिलो जितको खोजीमा नेपाल हुनेछ। यसैले पनि खेल निकै महत्वपूर्ण रहनेछ। यसअघि पहिलो खेलमा नेपाल लाओससँग २-१ ले र मलेसियासँग २-० ले हारेको थियो। यद्यपि मलेसिया कारबाहीमा परेको कारण सो खेलको नतिजा नेपालको पक्षमा आउने संभावना छ।

आजको खेलमा सकरात्मक नतिजा निकाल्ने चुनौती नेपाललाई रहेको छ। यदि जित निकाले नेपालको छनोटको संभावना कायमै रहनेछ। अहिले अंकविहिन नेपाल समूहको पुछारमा रहेको छ।

नेपालले अर्को खेल असोज २८ (अक्टोबर १४ मा) भियतनाममा नै खेल्नेछ। दशरथ रंगशालालाई एएफसीले अयोग्य घोषित गरेको कारण नेपालले होम र अवे दुवै खेल भियतनाममा खेल्न लागेको हो।

आज खेल आज साँझ ६:१५ बजे हुनेछ।

नेपाली राष्ट्रिय फुटबल टोली

किरण चेम्जोङ (कप्तान),अभिषेक लिम्बु, अनन्त तामाङ, अञ्जन विष्ट, एरिक विष्ट, आयुष घलान, विमल पाण्डे, विशाल सुनार, दीप कार्की , दिनेश हेंजन, जिलेस्पी जङ्ग कार्की, कृतिश रत्न छुन्जु, कुशल देउबा, लाकेन लिम्बु, मणी कुमार लामा, मनीष डाँगी, रोहित चन्द, रोहन कार्की, सनिश श्रेष्ठ, सुवास ठाकुरी बम, सुमित श्रेष्ठ, सुमन श्रेष्ठ र योगेश गुरुङ