काठमाडौं (हाम्रो खेलकुद) – नेपाली राष्ट्रिय फुटबल टोलीका कप्तान विराज महर्जन फिलिपिन्सविरुद्ध जितका लागि खेल्ने बताएका छन् । शनिबार फिलिपिन्स जाने टोलीलाई शुक्रबार अखिल नेपाल फुटबल संघ (एन्फा) ले विदाई गरेपछि विराजले भने, ‘फिलिपिन्सविरुद्ध जितका लागि खेल्नेछौ । नसके बराबरी गर्ने हाम्रो लक्ष्य हो । फिलिपिन्सविरुद्ध खेल्नुअघि मैत्रीपूर्ण खेल नहुदा केही अप्ठेरो त भएको छ । तर पनि हामी उत्कृष्ट प्रदर्शनको प्रयास गर्नेछौं ।’

एएफसी एसियन कप छनोट चरणको पहिलो खेलको नेपाल र फिलिपिन्सबीच चैत १५ गते रिजाल मेमोरिया रंगशालामा हुनेछ । शनिबार फिलिपिन्स जाने ३१ सदस्यीय नेपाली टोलीलाई युवा तथा खेलकुद मन्त्री दलजित श्रीपाली, एन्फा अध्यक्ष नरेन्द्र श्रेष्ठलगायतले विदाई गरेका थिए । नेपाली टोली शनिबार राती ११ बजे फिलिपिन्सका लागि उड्नेछ ।

नेपाली टोली जापनिज मुख्य प्रशिक्षक ग्यातोकी कोजीले फिलिपिन्ससँगको खेलका लागि टोली तयार रहेको बताएका छन् । ‘ खेलाडीले मिहेनत गरेको छन् । फिलिपिन्सलाई हराउने लक्ष्य छ ’ प्रशिक्षक कोजीले भने, ‘पछिल्ला तीन भेटमा नेपाल फिलिपिन्ससँग पराजित भएपनि लगतारको तीन उपाधिले नेपालको मनोवल उच्च छ । नेपाली टिममा पराजित गर्ने क्षमता छ । यद्दपी फिलिपिन्स कमजोर टोली होइन । ’ टोली प्रशिक्षक राजुकाजी शाक्यले फिलिपिन्सको मौसममा घुलमिल हुन सके नेपालले फिलिपिन्सलाई हराउने विश्वास व्यक्त गरे ।

युवा तथा खेलकुद मन्त्री श्रीपालीले टोलीलाई जितको शुभकामना दिदै खेलले नै राष्ट्रको प्रतिष्ठा बढाएको बताए । ‘एएफसी कपबाट बाहिरिसकेको अवस्थामा पुन मौका पाउनु नेपालको लागि ठुलो कुरा हो । फिलिपिन्सलाई पराजित गर्नेमा ढुक्क छु ’ मन्त्री श्रीपालीले भने, ‘पछिल्लो एक वर्षको तीन उपाधिले पनि नेपाललाई एसियन कप जस्तो ठुलो प्रतियोगिता खेल्ने मौका जुरेको हुनुपर्छ । यसका लागि सरकार र युवा तथा खेलकुद मन्त्रालय सदैव साथमा छ ।’

मन्त्री श्रीपालीले भौतिक पूर्वाधार अभावका कारण मैत्रीपूर्ण खेल खेल्न नपाएपनि फिलिपिन्सपछिको खेलपछि भने दोस्रो चरणको खेल घरेलु मैदानमै गराउने प्रतिबद्धता व्यक्त गरे । यसका लागि युवा तथा खेलकुद मन्त्रालयले दशरथ रंगशालाको भौतिक पूर्वाधारको पूर्ननिर्माणका लागि बजेट विनियोजन गरिसकेको समेत बताए ।

एन्फाका अध्यक्ष नरेन्द्र श्रेष्ठले तयारी सन्तोषजनक नरहेपनि नेपाली टोलीबाट सुखद नतिजाको अपेक्षा गरिएको बताए । ‘ फिलिपिन्स नेपाल भन्दा बलियो टिम हो । एसियन कपले बलियो टोलीविरुद्ध खेल्ने मौका जुराएको छ ’ अध्यक्ष श्रेष्ठले भने, ‘विपक्षी टिम जति नै बलियो भएपनि उनीहरुलाई पराजित गर्ने लक्ष्यका साथ खेल्न खेलाडीहरुलाई आग्रह गर्दछु ।’

नेपाली राष्ट्रिय फुटबल टोली
गोलकिपर – किरण चेम्जोङ, विकेश कुथु र विशाल श्रेष्ठ
रक्षक– डिफेन्समा विराज महर्जन, रविन श्रेष्ठ, अनन्त तामाङ, आदित्य चौधरी, कमल श्रेष्ठ, रन्जित धिमाल, जितेन्द्र कार्की
मिडफिल्ड – रोहित चन्द, विशाल राई, हेमन गुरुङ, विक्रम लामा, अञ्जन बिष्ट र सुजल श्रेष्ठ,
फरवार्ड – विमल घर्तीमगर, भरत खवास, रन्जन विष्ट र कर्ण लिम्बू
प्रशिक्षक टोली – प्रशिक्षक ग्यातोकी कोजी (मुख्य) , राजुकाजी शाक्य (प्रशिक्षक), उज्ज्वल मानन्धर ( गोलकिपिङ प्रशिक्षक)
व्यवस्थापक – विराटजंग शाही
चिकित्सक – राजु डंगोल