दिपक न्यौपाने
बुटबल – फर्साटिकर एफसी सैनामैना गोल्ड कप फुटबल प्रतियोगिताको फाइनलमा पुगेको छ । सुनौलो संगम युवा क्लब देविनगरलाई शनिबार २–१ ले हराउँदै फर्साटिकर उपाधि नजिक पुगेको हो । फर्साटिकरले मंगलबार उपाधिका लागि देशभक्त भैरव एफसीको सामना गर्नेछ ।

सुजन रानाको गोलबाट छैटौं मिनेटमा अग्रता लिएको फर्साटिकरका लागि आठौं मिनेटमा मुकेश कुँवरले गोल गरेका थिए । दोस्रो हाफको ३२ औं मिनेटमा सुनौलो संगमका लागि विश्वास श्रेष्ठले गोल फर्काएका थिए । फर्साटिकरका सुजन खेलको म्यान अफ दी म्याच घोषित भए । देशभक्तले शुक्रबार कपिलबस्तु युनाइटेडलाई ३–१ ले हराउँदै अन्तिम दुईको यात्रा तय गरेको थियो ।
जनप्रिय स्पोर्टस क्लब देवापारको आयोजनामा रुपन्देहीको सैनामैना वडा नं ७ मा जारी प्रतियोगितामा आइतबार भने आयोजक र पत्रकारबीच मैत्रीपूर्ण खेल राखिएको बताइएको छ । सैनामैना नगरपालीकाको संरक्षणमा सन्चालित प्रतियोगिताको विजेताले १ लाख १७ हजार तथा दोस्रो हुने टोलीले ५८ हजार रुपैयाँ प्राप्त गर्नेछन् । सेमिफाइनलमा पराजित हुने दुई टोलीले समान १२ हजार रुपैयाँ प्राप्त गर्नेछन् ।