एजेन्सी – फिफा कन्फेडेरेसन कप अन्तर्गत शनिबार रातीको खेलमा अष्ट्रेलियासँग १-१को बराबरी खेल्दै चिली समूहको दोश्रो स्थानमा रहँदै प्रतियोगिताको सेमिफाइनलमा पुगेको छ।
निकै प्रतिस्पर्धात्मक खेलमा दुवै टोली सेमिफाइनलमा पुग्ने लक्ष्य लिएर मैदानमा उत्रिएका थिए। अष्ट्रेलियाले खेलको ४२औं मिनेटमा गोल गर्दै अप्रत्यासित नतिजा निकाल्ने देखिएको थियो। जेम्स ट्रोइसीले डिफेन्सको गल्तिको फाइदा उठाउँदै गोलरक्षकलाई चिप गर्दै अष्ट्रेलियालाई अग्रता दिलाएका थिए।
खेलको दोश्रो हाफमा केहि आक्रामक देखिएको चिलीले बराबरी गोल फर्कायो। मार्टिन रोड्रीग्वेजले ६७औं मिनेटमा ६ यार्ड बक्स भित्रबाट गोल गर्दै चिलीलाई खेलमा फर्काएका थिए। अष्ट्रेलियाले त्यसपछि केहि सुनौला मौकाको सिर्जना गरेपनि त्यसको फाइदा उठाउन नसक्दा प्रतियोगिताबाट बाहिरियो।
समूहको उपविजेता बन्दै सेमिफाइनलमा पुगेको चिलीले फाइनल प्रवेशका लागि पोर्चुगलसँग खेल्नेछ।
