सागर थापाले आज अदालतबाट फर्किने बेलामा एन्फा विरोधी केहि मानिसहरुले उनीहरुलाई अपराधी भन्दै आफु फाइदा लिन खोजेको बताएका छन|
खेल मिलेमतो गरेको आरोपमा पक्राउ परेका ५ खेलाडीहरुको बयान सकिएपछि आज विशेष अदालतमा बहस सुरु हुने भनिएको थियो| तर समय अभावका कारण थुनछेक बयान सकिएपनि थुनछेक बहस हुन नसकेकाले भोलीलाई सारिएको अदालतले जनाएको छ।
अदालतबाट फर्किने क्रममा पत्रकारहरुको प्रश्न जवाफ दिदैं सागर थापाले मणि शाह, विजय मानन्धर लगाएतका एन्फा विरोधी खेमाले उनीहरु माथि लागेको आरोपको फाइदा उठाउदैं आफ्नो फाइदा लिन खोजेको अभिव्यक्ति दिए| “हामीलाई फसाएर उनीहरु अगाडी बढ्न खोजेको होला, तर हामी निर्दोष भएको पुष्टि भएपछि उनीहरुको शिर झुक्नेछ,” थापाले भने| मणि शाह, विजय नारायण मानन्धर लगाएत कहिले प्रहरीको प्रतिवेदनमा आरोपित खेलाडीहरुलाई कारवाही गरिनु पर्छ भनेर बयान दिएका छन|
राष्ट्रिय फुटबल टिमका कप्तान सागर थापा लगायतका खेलाडीले राज्य विरुद्धको अपराध गरेको आरोप सहित सरकारी वकिल कार्यालयले आइतबार विषेश अदालतमा मुद्दा दायर गरेको थियो।
गत असोज २७ गते प्रहरीले राष्ट्रिय टोलीका कप्तान सागर थापा, सन्दीप राई, अन्जन केसी, रितेश थापा र विकाससिंह क्षेत्रीलाई विभिन्न ठाउँबाट समाएको थियो| खेलाडीमाथि लगाइएको अभियोग पुष्टि भए जन्मकैदसम्मको सजाय हुनेछ।
