एजेन्सी – इटालियन राष्ट्रिय फुटबल टोलि एवं पेरिस सेन्ट जर्मन (पिएसजी)का मिडफिल्डर मार्को भेर्राट्टीलाई क्लबले बन्दी बनाएको बार्सिलोनाका अध्यक्ष जोसेप मारिया बार्टोमेउले आरोप लगाएका छन्। बार्साले सिजनको अन्त्य भएदेखिनै भेर्राट्टिलाई क्लबमा ल्याउने योजना बनाएको थियो।

नवनियुक्त प्रशिक्षक एर्नेस्टो भालभेर्डे पनि भेर्राट्टिको प्रशंसक रहेको र उनको खेलशैली बार्सिलोनामा मेल खाने भएकोले बार्सिलोनाले यसपटक उनैलाई मुख्य खेलाडीको रुपमा उभ्याएको छ। तर, पिएसजीले कुनै हालतमा पनि खेलाडीलाई नछाड्ने निर्णय लिएपछि बार्सिलोना समस्यामा परेको छ। भेर्राट्टि स्वयं बार्सा आउन इच्छुक रहेकाले पिएसजीले उनलाई बन्धक बनाएको आरोप अध्यक्ष जोसेपले लगाएका छन्।

‘भेर्राट्टि बार्सिलोनाको मिडफिल्ड सम्हाल्न सक्ने खेलाडी हुन् र प्रशिक्षक पनि उनलाई राम्रो ठान्दछन्। भेर्राट्टि आफैं पनि बार्सिलोना आउन आतुर देखिएका छन्। तर पिएसजी भने उनको कुनै रकममा तुलना हुन नसक्ने बताउँदै उनलाई क्लबमै राख्न चाहन्छन्।’

भेर्राट्टिका एजेन्टले पनि पिएसजीका मालिकले उनलाई विक्री नगर्ने निर्देशन दिइसकेको बताउँछन्। एजेन्ट डोनाटो डे काम्प्लीले भेर्राट्टि आफैं बार्सा जान इच्छुक रहेपनि क्लबका मालिकले त्यसो गर्नबाट जसरी पनि रोक्ने निर्णय लिएको बताए।

बार्सिलोना अध्यक्ष जोसेपले क्लबले नचाहेसम्म खेलाडीको केहि नलाग्ने हुनाले सकेसम्म चाँडो पिएसजीसँग वार्ता गर्ने बताए। उनले खेलाडीको रिलिज क्लज भएको अवस्थामा क्लबले खर्च गर्न पछि नहट्ने भएपनि यस अवस्थामा भने पेरिससँग वार्ता गर्न कुर्नै पर्ने रहेको बताए।