एजेन्सी – १८ महिनाको उमेरदेखि न्युरोब्लास्टोमा नामक दुर्लभ क्यान्सरबाट पिडित रहेका इङ्गलिस् क्लब सन्डरल्याण्ड फुटबल क्लबका समर्थक ब्राडली लोअरीको ६ वर्षको उमेरमा निधन भएको छ। उनको परिवारले सामाजिक संजालमा संदेश लेख्दै उनको निधन भएको बताएको हो।
यसै सिजन रेलिगेसनमा पारेको सन्डरल्याण्डले गत सिजन उनलाई क्लबको मस्कट बनाएको थियो। उनको क्लबका मुख्य स्ट्राइकर एवं इङ्गल्याण्ड राष्ट्रिय टोलीका फरवार्ड जर्मेन डेफोसँग गहिरो मित्रता रहेको थियो। डेफो केहि दिन अघि पनि ब्राडलीलाई भेट्न उनकै निवास पुगेका थिए। यसै साता बर्नमाउथसँग अनुबन्धित रहेका डेफोले ब्राडलीलाई जिन्दगिभर बिर्सन नसक्ने भन्दै भक्कनिएका थिए।
उनको उपचारका लागि फुटबलसँग सम्बन्धित क्लब, समर्थकदेखि खेलाडीसम्मले पनि निकै सहयोग गरेका थिए। तर उक्त रोगको उपचार सम्भव नभेटिएकोले उनले मृत्युको सामना गर्नुपर्यो। उनको सहयोगार्थ खोलिएको च्यारिटीमा संसारभरका मान्छेले योगदान दिएका थिए। ब्राडलीको परिवारले उठेको पैसा यस रोग लागेर थला परेका अन्य बिरामीमा खर्च हुने बताएको छ।
गत वर्ष इङ्गल्याण्डको मैत्रीपूर्ण खेलमा ब्राडली मुख्य मस्कट बनेर खेलमैदानमा देखिएका थिए। त्यससँगै डिसेम्बर महिनामा उनले गोल अफ द मन्थको उपाधि पनि जिते। प्रशिक्षणका क्रममा चेल्सीका गोलरक्षक आस्मीर बेगोभिचलाई हानेको पेनाल्टीले थुप्रै वहवाहि पाएको थियो। उनलाई विभिन्न क्लबले निमन्त्रणा दिएर आफ्नो क्लबका खेलाडी एवं प्रशिक्षकसँग भेटघाट गराएको थियो।
अनेक समस्याका बावजुद पनि सधैं हँसिलो रहने ब्राडलीले फुटबल जगत मात्र हैन अन्य क्षेत्रका मानिसलाइ पनि प्रेरणा दिएका छन्। हाम्रो खेलकुद डट कम मृत आत्माको चिर शान्तिको कामना गर्दछ।
