एजेन्सी – बेल्जियन स्ट्राइकर रोमेलु लुकाकु म्यानचेस्टर युनाइटेड जाने पक्का भएसँगै चेल्सीले आफ्नो ध्यान इटालियन स्ट्राइकर आन्द्रीए बेलोट्टीतर्फ मोडेको छ। गत सिजन राष्ट्रिय टोली र क्लब गरेर कुल ३२ गोल गरेका बेलोट्टी इटालियन क्लब टोरीनोबाट खेल्दै आएका छन्।

प्रशिक्षक एन्टोनियो कन्टेको नजरमा लुकाकु पहिलो रोजाई भएपनि उनलाई भित्र्याउन नसकेपछि चेल्सीले अन्य स्ट्राइकर खोजेको हो। प्रशिक्षक कन्टे आइतबारबाट चेल्सीको प्रशिक्षणमा सामेल भएसँगै चेल्सीले औपचारिक रुपमा प्रस्ताब राख्ने बुझिएको छ। गत सिजन चेल्सीका लागि सर्वाधिक गोल गरेका डिएगो कोष्टालाई प्रशिक्षक कन्टेले आफ्नो योजनामा नराखेसँगै चेल्सी नयाँ खेलाडीको खोजमा रहेको छ।

लुकाकुले युनाइटेडबा खेल्ने पक्का भएसँगै कन्टे चेल्सीको बोर्डसँग रिसाएको भन्ने अपुष्ट खबरपनि ब्रिटिस मिडियामा आएको छ। गत सिजन प्रिमियर लिग उपाधि जितेपछि कन्टेले अर्को सिजनको बारे सोच्नु पर्ने प्रतिक्रिया दिएका थिए। चेल्सीले आर्सनलका एलेक्सिस स्यान्चेज र रियल म्याड्रिडका अल्भारो मोराटालाई पनि आफ्नो विकल्पमा राखेको छ।

यद्दपी इटालीका यूवा स्ट्राइकर आन्द्रीए बेलोट्टी कन्टेको लागि मुख्य हतियार बन्ने सम्भावना प्रबल छ। कन्टे आफैं इटालीका भएका र उनले आफु इटालीमा रहँदा उनको प्रदर्शन देखेकाले पनि बेलोट्टीलाई भित्र्याउनु चेल्सीका लागि राम्रो हुने बुझाई छ। टोरीनोले बेलोट्टीका लागि ९० मिलियन पाउण्ड तिर्नुपर्ने माग राख्दै आएकोमा चेल्सीले प्रशिक्षक कन्टेलाई खुसि बनाउन कुनै हालतमा पनि उनलाई भित्र्याउनु पर्ने बाध्यता रहेको छ।

कोष्टाको प्रस्थानसँगै चेल्सीमा मुख्य स्ट्राइकरका रुपमा बेल्जियन मिशी बात्शुआइ रहनेछन्। गत सिजन एकदम कम खेल समय पाएका उनले टोलीका लागि महत्त्वपूर्ण गोल गरेका थिए। यस सिजन उनले केहि बढी अवसर पाउने अपेक्षा गरिएको छ। मार्सेबाट आएका बात्शुआइले आफु चेल्सीमै रहने स्पष्टोक्ति दिइसकेका छन्।