वाटफोर्ड (एजेन्सी) – प्रिमियर लिगमा गए राति आर्सनलले वाटफोर्डसँग २-१ को हार बेहोरेको छ । वाटफोर्डका लागि ट्रोय डिनी र टम क्लेभरलीले गोल गरेका थिए भने पर मर्टिस्याकरले आर्सनलका लागि एक गोल गरेका थिए ।
वाटफोर्डको घरेलु मैदान भिकरेज रोडमा आर्सनलले ३९ औं मिनेटमा अग्रता लिएको थियो । ग्रानिट जाकाको कर्नरमा मर्टिस्याकरले गोल गरेका थिए । यो खेल क्लबका कप्तान मर्टिस्याकरको यस सिजनको पहिलो सुरुवात पनि थियो । तर आर्सनलको सो अग्रता पहिलो हाफसम्म मात्र टिक्यो ।
खेलको ७० औं मिनेटमा आर्सनलका डिफेन्डर हेक्टर बेल्लेरिनले रिचार्लिसनलाई लडाउँदा पाएको पेनाल्टीलाई वाटफोर्डका परिवर्तित खेलाडि डिनीले गोलमा परिणत गरेका थिए । त्यस्तै इन्ज्युरी समयमा पूर्व म्यानचेस्टर युनाइटेडका खेलाडी टम क्लेभरलीले गोल गर्दै वाटफोर्डलाई रोमञ्चक जित दिलाएका थिए ।
यस जितसँगै सिजनमा बलियो सुरुवात गरेको वाटफोर्ड १५ अंकसहित तालिकाको चौथो स्थानमा उक्लेको छ । अर्को तर्फ ८ खेलमा १३ अंक बटुलेको आर्सनल भने छैठौँ स्थानमा झरेको छ ।
