म्याड्रिड (एजेन्सी) – रियल म्याड्रिडका स्टार क्रिस्टियानो रोनाल्डोले ला लिगाको गोल्डेन बुट आफुले नै जित्ने भन्दै क्लबका अन्य खेलाडीसँग बाजी राखेको खुलासा भएको छ । यद्दपी सिजनमा उनको सुरुआत भने राम्रो हुन सकेको छैन ।
उनका प्रतिस्पर्धी मानिएका लियोनल मेस्सी भन्दा रोनाल्डो यो सिजन ११ गोलले पछि रहेका छन् । रोनाल्डोलाई विश्व फुटबलमा बलियो मनोबलको खेलाडी मानिन्छ । त्यसैले सोचे जस्तो सुरुआत गर्न नसकेपनि आउने दिनमा आफ्नो पूरानै लयमा फर्किने उनले दाबी गरेका छन् ।
पत्रकार जोसे रामोस डी ला मोरोनाले रेडियो मार्कासँगको कार्यक्रममा यो साता रोनाल्डोले ड्रेसिङ रुपमा आफ्नो साथीहरुसँग व्यक्त गरेको महत्वकांक्षालाई सार्वजनिक गरेका थिए । बार्सिलोनाका मेस्सीले यो सिजन १२ गोल गरिसकेका छन् भने रोनाल्डोले १ गोलमात्र गरेका छन् । त्यसका वावजुद उनी सिजनको सर्वाधिक गोलकर्ताले पाउने पिचिचि अवार्ड जित्नेमा विश्वस्त छन् ।
मेस्सीलाई पछ्याउँदै भ्यालेन्सियाका सिमोने जाजाले ९ र भिल्लारियलका केड्रिकले यो सिजन ८ गोल गरिसकेका छन् । जिनेदिन जिदानको रियलले अब ला लिगामा शहरी प्रतिद्वन्द्वि एट्लेटिको म्याड्रिडको सामना गर्नेछ । गत वर्ष एट्लेटिकोविरुद्ध रोनाल्डोले ह्याट्रिक गरेका थिए ।
