ब्रसेल्स (एजेन्सी) – चेल्सीका फरवार्ड एडेन हाजार्डले रियल म्याड्रिडमा खेल्ने आफ्नो चाहनाको सङ्केत दिएका छन् । विगतका केहि वर्षदेखि रियल पनि हाजार्डलाई भित्र्याउन खोजिरहेको छ ।

बेल्जियमको पत्रिका आरटिएलसँग बोल्दै हाजार्डले जिनेदि जिदानसँग खेल्नु उनको सपना रहेको बताएका छन् । जिदान पनि आफ्ना अन्तरवार्ताहरुमा हाजार्डको प्रशंसा गरेको पाइन्छ ।

“सबैलाई थाहा भईसक्यो होला म जिदानलाई कति सम्मान गर्छु । उनी खेलाडि र उत्तिकै राम्रा प्रशिक्षक पनि हुन् । म उहाँको टोलीमा एक दिन अवश्य खेल्न चाहन्छु,” हाजार्डले आरटिएललाई बताए ।

चेल्सीमा हाजार्ड सन् २०२० सम्म आबद्ध छन् र गत सालसहित २०१४/१५ सिजनमा लिगको उपाघि पनि जितिसकेका छन् । त्यति बेला उपाधि जित्दाको प्रशिक्षक जोसे मौरिन्होको पनि हाजार्डले प्रशंसा गर्दै उनका लागि खेल्न पनि आफू तयार रहेको बताए ।

जिदानले २०१६ को जनवरीमा रियल सम्हाले यता टोलीलाई लगातार च्याम्पियन्स लिगको उपाधि जिताएका छन् । हाजार्डले पनि २०१२ मा प्रिमियर लिगमा आएयता दुई पटक प्रिमियर लिग उपाधि जितिसकेका छन् ।

अन्तरवार्ताको अन्तिममा हाजार्डले चेल्सीमा आफ्नो अझै कर्तव्य रहेको र अहिलेको सिजनमा आफ्नो ध्यान केन्द्रित रहेको पनि जनाए । तर च्याम्पियन्स लिग उपाधि र जिदानका लागि खेल्ने आफ्नो चाहना पूरा गर्ने खोजिमा उनी रियल पुग्ने सम्भावना पनि उत्तिकै देखिएको छ ।