काठमाडौं (हाम्रो खेलकुद)– नेपाली राष्ट्रिय टिमका रक्षक देवेन्द्र तामाङ चोटका कारण कम्तीमा ३ महिना मैदान बाहिर रहनुपर्ने भएको छ । एएफसी एसियन कप छनोट अन्तर्गत फिलिपिन्ससँगको खेलका लागि प्रशिक्षणका क्रममा गत साता एमसिएल च्यातिएपछि लेफ्ट ब्याक देवेन्द्रले आराम गर्नुपर्ने भएको छ ।
देवेन्द्र तामाङ (रातो जर्सी) ले यमनसँगको खेलमा ‘डेब्यू’ गरेका थिए । फाइल तस्बिर
टोलीका चिकित्सक राजु दाहालले कम्तीमा देवेन्द्र तीन महिना मैदान बाहिरन रहने सक्ने उल्लेख गर्दै,‘रिकभरी कसरी हुन्छ त्यसमा बढी भर पर्दछ । ’ नेपाल र फिलिपिन्सबीच मंगलबार हुने खेलमा उनी हुने छैनन् । देवेन्द्रले जेठ ३० गते काठमाडौंमा भएको यमनसँगको खेलमा राष्ट्रिय टोलीबाट ‘डेब्यू’ गरेका थिए ।
उनले तीनवटा खेलमा देशको प्रतिनिधित्व गरिसकेका छन् । यमनपछि उनले ताजिकिस्तानविरुद्धका दुवै खेल खेलेका थिए । झापा–११ बाट व्यवसायिक फुटबल खेलिरहेका देवेन्द्रले फागुनमा बंगलादेशमा भएको शेख कमल क्लब कप अन्तर्राष्ट्रिय फुटबल प्रतियोगितामा मनाङ–मस्र्याङ्दी क्लबबाट खेलेका थिए ।
