काठमाडौं (हाम्रो खेलकुद) – एएफसी एसियन कप छनोटअन्तर्गत भोली नेपालविरुद्ध हुने खेल सहज नहुने फिलिपिन्सका मुख्य प्रशिक्षक थोमस डोलले बताएका छन् ।

‘पछिल्लो समयमा नेपालले निकै सुधार गरेको छ । यो खेल हाम्रो लागि निकै महत्वपूर्ण छ । नेपालमाथि जित हात पार्नु हामीलाई सजिलो हुनेछैन ’ आज आयोजित प्रि म्याच कन्फ्रेन्समा प्रशिक्षक डोलेले भने, ‘घरेलु मैदानमा नेपालसँग खेल्न निकै गाह्रो हुन्छ भन्ने सुनेको छु । त्यसका वावजुद भोली हुने खेल निकै प्रतिस्पर्धात्मक हुने र त्यसमा हामीले सफलता हासिल गर्ने आशा गरेका छौं ।

प्रशिक्षक डोलेले हरेक टोलीको प्रदर्शन सधै उस्तै नहुने बताए । यसअघिको खेलमा फिलिपिन्स ४–१ ले विजयी भएको प्रसंगमा डोलले भने, ‘त्यो खेल अर्कै हो, भोलि अर्कै खेल हुनेछ । खेल सधै एकनासको रहदैन । हरेक खेल फरक हुन्छ । तर पनि हाम्रो सधै प्रयास जित्नकै लागि हुन्छ ।’ नेपालसँगको अन्तिम तयारीका लागि फिलिपिन्स पाँच दिनअघि नेपाल आइसकेको थियो ।

समूह ‘एफ’ मा रहेको नेपाल १ अंकसहित तालिकाको पुछारमा छ । फिलिपिन्स ८ अंकसहित शीर्ष स्थानमा छ । नेपाललाई पराजित गरे फिलिपिन्स पहिलो पटक एसियन कपको लागि छनोट हुनेछ । समूहमा यमन र ताजकिस्तानको समान ६ अंक छ ।