मस्को (एजेन्सी) – अन्तर्राष्ट्रिय मैत्रीपूर्ण खेलअन्तर्गत आज अर्जेन्टिना नाइजेरियाको सामना गर्दै छ । रुसको क्रास्नोडार स्टेडियममा खेलिने सो खेल नेपाली समय अनुसार १०.१५ बजे सुरु हुने छ ।

नाइजेरियाले गत महिना जाम्बियाविरुद्ध १-० को जितसँगै विश्वकपमा आफ्नो स्थान पक्का गरेको थियो । त्यस्तै लियोनल मेस्सीको ह्याट्रिकको मद्दतले अर्जेन्टिनाले इक्वाडोरलाई पराजित गर्दै विश्वकपमा आफ्नो स्थान सुरक्षित गरिसकेको छ ।

आज भने मेस्सीलाई अर्जेन्टिनाले विश्राम दिने छ । अर्जेन्टिनाले आफ्नो पछिल्लो खेलमा सर्जियो अगुएरोको निर्णायक गोलमा रुसलाई १-० ले पराजित गरेको थियो ।

नाइजेरियाका लागि कप्तान जोन ओबि मिकेल टोलीमा फर्कँदै छन् । शुक्रबार खेलिएको मैत्रीपूर्ण खेलमा नाइजेरियाले अल्जेरियासँग १-१ को बराबरी खेलेको थियो ।  यी दुई राष्ट्र बीच खेलिएको सन् २०१४ को पछिल्लो खेलमा अर्जेन्टिना ३-२ ले विजयी भएको थियो ।

त्यस्तै आज राति २.३० बजे पोर्चुगल अमेरिका (युएसए)को सामना गर्ने छ । पोर्चुगलले पनि आफ्नो मुख्य खेलाडि क्रिस्टियानो रोनाल्डोलाई विश्राम दिएको छ । यी दुई बीचको पछिल्लो दुई खेलमा अमेरिकाको एक जित छ तथा एक बराबरी रहेको छ ।

यस पटक अमेरिका विश्वकपमा छनोट हुन असफल रह्यो भने युरोपियन विजेता पोर्चुगल युरोपको समूह बीको विजेता बन्दै छनोट भएको हो ।

आज खेलिने मैत्रीपूर्ण खेलहरुको तालिका:

कतार विरुद्ध आइसल्यान्ड – १०.१५ बजे

स्लोभाकिया विरुद्ध नर्वे – १०.४५ बजे

रुस विरुद्ध स्पेन – १२.३० बजे

रोमानिया विरुद्ध नेदरल्यान्ड्स – १२.४५ बजे

हंगेरी विरुद्ध कोस्टा रिका – १ बजे

अल्जेरिया विरुद्ध सेन्ट्रल अफ्रिकन रिपब्लिक – १.१५ बजे

बेल्जियम विरुद्ध जापान – १.३० बजे

जर्मनी विरुद्ध फ्रान्स – १.३० बजे

अष्ट्रिया विरुद्ध उरुग्वे – १.३० बजे

वेल्स विरुद्ध पानामा – १.३० बजे

इङ्ग्ल्यान्ड विरुद्ध ब्राजिल – १.४५ बजे