काठमाडौं (हाम्रो खेलकुद)– प्रथम चन्द्रागिरि गोल्ड कपको आज हुने उद्घाटन खेलमा ए डिभिजन क्लब फ्रेन्ड्स र आयोजक ब्राइट युथ क्लबबीच हुनेछ । खेल नैकापस्थित मैदानमा दिउँसो २ बजे सुरु हुने बताइएको छ ।
नकआउटका आधारमा हुने प्रतियोगितामा सहभागी ८ टिमलाई दुई समूहमा विभाजन गरिएको छ । समूहको विजेता फाइनलमा पुग्नेछ । आयोजकबाहेक प्रतियोगितामा ‘ए’ डिभिजनका त्रिभुवन आर्मी, नेपाल पुलिस क्लब, सिएमजी क्लब संकटा, हिमालयन शेर्पा, फ्रेन्डस क्लब, जाउलाखेल युथ क्लब र नेपाल एपिएफ क्लबको सहभागिता रहेको छ ।
समूह ‘ए’ मा ब्राइट युथ , फ्रेन्ड्स, पुलिस र संकटा छन् । आर्मी, जावलाखेल, हिमालयन र एपिएफ अर्को समूहमा छन् । प्रतियोगिताको विजेताले उपाधिसहित ५ लाख, दोस्रो हुने टोलीले २ लाख ५० हजार रुपैयाँ प्राप्त गर्नेछ । प्रतियोगिताको उत्कृष्ट खेलाडी र सर्वाधिक गोलकर्ताले समान ३० हजार रुपैयाँ तथा हरेक खेलको ‘म्यान अफ दि म्याच’ले ३ हजार रुपैयाँ पाउनेछन् ।
प्रतियोगितालाई नेपाल जनरल मार्केट (हिरो) ले मुख्य प्रायोजन गरेको छ । प्रतियोगितालाई चन्द्रागिरि नगरपालिकाको युनाइटेड सिमेन्ट लगायतले प्रायोजन गरेको छ । प्रतियोगिताको लागि करिब ५५ लाख खर्च हुने आयोजकले अनुमान गरिएको छ ।
