काठमाडौं (हाम्रो खेलकुद) – सुमन भोम्जन मेमोरियल स्मृति हेटौडा आमन्त्रण गोल्ड कप फुटबल प्रतियोगिताको तेस्रो संस्करण पुस पहिलो साता आयोजना हुने भएको छ । सुमन भोम्जन स्मृति खेलकुद प्रतिष्ठानले प्रतियोगिता पुस ८ गते १५ गतेसम्म हेटौंडामा आयोजना हुने बुधबार नेपाल खेलकुद पत्रकार मञ्चमा पत्रकार सम्मेलनको आयोजना गर्दै जानकारी दिएको छ । 

प्रतियोगितामा ‘ए’ डिभिजनका तीन विभागीयसहित ६ टोली, एक आयोजक तथा भुटान र भारतमध्येको एक टोलीले प्रतियोगितामा प्रतिस्पर्धा गर्ने प्रतिष्ठानका अध्यक्ष भेष खड्गीले जानकारी गराए ।प्रतियोगिताको विजेताले उपाधिसहित ५ लाख, दास्रो हुने टोलीले ३ लाख रुपैयाँ प्राप्त गर्नेछन् । प्रतियोगिताको सर्वोत्कृष्ट खेलाडीले २५ हजार रुपैयाँ प्राप्त गर्ने छन् भने हरेक खेलको म्यान अफ दी म्याचले ५ हजार रुपैयाँ पाउनेछन् ।

टुबोर्ग र रेडबुलले मुख्य प्रायोजन रहेको प्रतियोगितालाई टाटा सुमो गोल्डले सह प्रायोजन गरेको छ । मुख्य प्रायोजक टुबोर्ग र रेडबुलले नदग र जन्सी गरि करिब २५ लाख र सह प्रायोजकले झन्डै १२ लाख रुपैयाँ उपलब्ध गराउने प्रतियोगिता संयोजक विशाल घोषले जनाकारी दिए । गत वर्ष त्रिभुवन आर्मी क्लबले उपाधि जितेको थियो । लक्ष्मी हुन्डाई मनाङ मस्र्याङ्दीलाई हराउँदै आर्मीले उपाधि जितेको थियो ।

स्वर्गिय खेलकुद पत्रकार सुमन भोम्जनको स्मृतिमा प्रतिष्ठान स्थापना भएको वर्षदेखि गोल्ड कप आयोजना हुँदै आएको छ । नेपाल खेलकुद पत्रकार मञ्च मकवानपुर समन्वय शाखाका संस्थापक अध्यक्ष समेत रहेका गोरखापत्रमा कार्यरत रहँदा भोम्जनको २०७२ वैशाख १२ गतेको विनाशकारी भूकम्प परि मृत्यु भएको थियो । वीर अस्पताल नजिक रहेको भोम्जन बस्दै आएको घर भत्किएपछि उनी त्यसमा परेका थिए ।