काठमाडौं (हाम्रो खेलकुद) – ए डिभिजन टोली त्रिभुवन आर्मी क्लब राजधानीमाजारी प्रथम चन्द्रागिरी गोल्डकप फुटबल प्रतियोगिताको सेमिफााइनल पुगेको छ । नैकापस्थित खेल मैदानमा आज टाइब्रेकरमा अर्को ए डिभिजन टोली जावलाखेल युथ क्लबलाई ५–३ ले हराउँदै विभागिय टोली अन्तिम चारमा पुगेको हो ।

निर्धारित र थप समयमा पनि गोलरहित बराबरीमा टुंगिएपनि खेलको निर्णय पेनाल्टी सुटआउट बाट भएको थियो । आर्मीको दोस्रो रोजाईका गोलरक्षक गान्दिप खड्काले एउटा पेनाल्टी रोकेपछि आर्मीको जित निश्चित बनेको थियो । पेनाल्टीमा आर्मीका कप्तान हिरण्य मगर, राजीव गुरुङ, एरिक विष्ट, दिनेश कार्की र रुपेश क्षत्रीले गोल गरे ।

जावलाखेलका राम थापामगर, सिदिवे र असिम थापाले गोल गरे । सुरज ठकुरीको प्रहार गोलरक्षक गान्दिपले राके । यू–१९ टोलीका ४ खेलाडी समेटेर खेलेको आर्मीले समयमा पाएको केही मौकाहरु खेर फालेको थियो । तीन विदेशी खेलाडीसहित मैदानमा उत्रिएको जावलाखेलले पाएको मौका उपयोग गर्न सकेन ।

पहिलो रोजाईका गोलकिपर महेश्वर श्रेष्ठ दोस्रो हाफमा घाइते भएपछि ६३ औं मिनेटमा गान्दिप मैदान प्रवेश गरेका थिए । उनी खेलको म्यान अफ दी म्याच घोषित भए र ३ हजार रुपैयाँ प्राप्त गरे । ब्राइट युथ क्लबको आयोजनामा जारी प्रतियोगिताको विजेताले ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ ।

चन्द्रागिरि गोल्ड कपमा बिहीबारको खेल
नेपाल पुलिसविरुद्ध सिएमजी क्लब संकटा