सिड्नी (एजेन्सी) – विश्वकपको अन्तर-महादेशीय छनोट खेलअन्तर्गत अष्ट्रेलियाले हन्डुरसलाई ३-१ ले हराउँदै रुस विश्वकपमा आफ्नो स्थान सुरक्षित गरेको छ । अष्ट्रेलियाका लागि पूर्व प्रिमियर लिग खेलाडि मिल जेडिनाकले दुई गोल गरे ।
हन्डुरसमा खेलिएको पहिलो लेग गोलरहित बराबरीमा टुङ्गिएको थियो । तर आफ्नो घरेलु मैदानको फाइदा उठाउँदै अष्ट्रेलिया सहज जित दर्ता गर्न सफल रह्यो । खेलको ५३ औं मिनेटमा जेडिनाकको फ्रिक हेनरी फिगेरोआलाई लागेर आत्मघाती गोल भएको थियो ।
त्यस्तै ७२ औं मिनेटमा हन्डुरसका ब्रायन अकोस्टाले बक्सभित्र ह्यान्डबल गर्दा घरेलु टोलीले पेनाल्टी पाएको थियो । सो पेनाल्टीलाई जेडिनाकले गोलमा परिणत गर्दै आफ्नो टोलीको अग्रता दोब्बर बनाएका थिए ।
यसै गरी ८५ औं मिनेटमा पाएको पेनाल्टीमा जेडिनाकले फेरी गोल गर्दै स्कोर ३-० बनाएका थिए । होन्डुरसका लागि अन्तिम मिनेटतिर अल्बर्थ एलिसले एक सान्तवना गोल गर्न सफल भएका थिए ।
यस जितसँगै अष्ट्रेलिया विश्वकपमा छनोट हुने ३१ औं राष्ट्र बनेको छ । यस अघि अर्को वर्षको रुस विश्वकपका लागि ३० राष्ट्र छनोट भइसकेका थिए । अष्ट्रेलिया सन् २००६ देखि लगातार विश्वकपमा स्थान बनाउन सफल भइराखेको छ ।
