बार्सिलोना (एजेन्सी)– बार्सिलोनाका पूर्व सुपर स्टार रोनाल्डिन्होले लिभरपुलका फिलिपे काउटिन्हो पूर्व क्लबका लागि उपयुक्त हुने भएको बताएका छन् । यो सिजन पटक पटकको प्रयासपछि पनि बार्सिलोना काउटिन्होलाई भित्राउन असफल भएको थियो । यद्दपी बार्सिलोनाले अझै पनि उनलाई लिन प्रयास थाल्ने बताइएको छ ।

रोनाल्डिन्होले आफु ब्राजिलियन काउटिन्होलार्ई बार्सिलोनाको जर्सीमा हेर्न उत्साहित भएको बताएका छन् । ‘त्यस्तो प्रतिभावान खेलाडीलाई आफुले वर्षो लगाएको जर्सीमा हेर्न पाउदा मलाई निकै खुसी लाग्ने छ ’ रोनाल्डिन्होले भने, ‘उनी जसरी खेल्छन् त्यो बार्सिलोनाका लागि उपयुक्त छ । त्यस्ता खेलाडीलाई बार्सिलोनाको जर्सीमा हेर्दा खुसी लाग्नेछ । जुन स्तरमा उनी फुटबल खेल्छन् मलाई लाग्छ त्यसले अर्को वर्ष हुने विश्व कपमा ब्राजिललाई फाइदा पुग्नेछ ।’

अझै पनि बार्सिलोना जाने आशा पालेका काउटिन्होले अहिले भने लिभरपुलमै केन्द्रित हुने बताएका छन् । उनले विश्व कपका विषयमा पनि सोचेको बताएका छन् । उनी अझै आफ्नो खेलमा सुधार गर्न चाहन्छन् । उनी सम्मिलित ब्राजिलले मंगलबार इङ्ल्यान्डसँगको मैत्रीपूर्ण खेलमा गोलरहित बराबरी खेलेको थियो । त्यसअघि उनले चोटका कारण लिभरपुलका तीन खेल गुमाएका थिए ।