काठमाडौं (हाम्रो खेलकुद)– सिएमजी क्लब संकटा राजधानीमा जारी चन्द्रागिरी गोल्ड कप फुटबल प्रतियोगिताको सेमिफाइनलमा पुगेको छ । चन्द्रागिरी नगरपालिकाको नैकापस्थित मैदानमा आज भएको खेलमा नेपाल पुलिस क्लबलाई २–० ले हराउँदै संकटाले अन्तिम चारमा स्थान बनाएको हो ।

संकटाको जितमा दुवै गोल विदेशी खेलाडीले गरेका थिए । खेल सुरु भएको ७ मिनेट भित्र २ गोलको अग्रतालाई जोगाउँदै संकटाले वर्षको दोस्रो उपाधिको यात्रालाई अघि बढाएको हो । संकटाका लागि अफ्रिकी मुलका फ्लोरेन्स कोआभा र मार्टिन्स अजयीले गोल गरे । संकटाले वर्षको पहिलो उपाधिका रुपमा गत साता नवलपरासीको कोल्हुवामा राइनो संरक्षण गोल्ड कप फुटबल प्रतियोगिताको उपाधि जितेको थियो ।

पाँचौं मिनेटमा फ्लोरेन्सले हेडगोलमार्फत संकटालाई सुरुआती अग्रता दिलाएका थिए । फ्लोरेन्सले अमित तामाङको कर्नर बललाई हेड गरेका थिए । त्यसको दुई मिनेट पछि मार्टिन्सले बाइ साइकिल किकबाट गोल गर्दै अग्रता दोब्बर पारे । गोलमा फर्कने अवसर सदुपयोग गर्न नक्सदा घरलु फुटबलको सफल टोली मध्येको एक पुलिस पहिलो खेलबाटै बाहिरीएको छ ।

२३ औं मिनेटमा पुुलिसका अभिषेक रिजालले गोल गर्न सकेनन् । ३२ औं मिनेटमा रवि पासवानले पनि गोल गर्ने मौका खेर फाले । ३६औं र ४४ औं मिनेटमा अभिषेकले मौका पाए, तर गोल गर्न सकेनन् । संकटाका मार्टिन्सले ३४ औं मिनेटमा गोलअन्तर बढाउने मौका खेल फाले । ४२ औं मिनेटमा संकटाका अमितको फ्रिकिक क्रसबारमा लागेर फर्कियो ।

४८ औं मिनेटमा गोलकर्ता मार्टिन्स वान भर्सेस वानमा गोल गर्नबाट चुके । ८८ औं अमित तामाङको फ्रिकिक निराजन खड्काले भेट्टाउन सकेन ।संकटाका फ्लोरेन्स म्यान अफ दि म्याच घोषित भए र उनले ३ हजार रुपैयाँ जिते । संकटाले शनिबार सेमिफाइनलमा अर्को ए डिभिजन क्लब फ्रेण्डस् क्लबको सामना गर्नेछ ।

फ्रेण्डसले आयोजक ब्राइट युथ क्लबलाई ४–३ ले हराउँदै अन्तिम चारको यात्रा तय गरेको थियो । त्रिभुवन आर्मी क्लब हिजो सेमिफाइनल पुगेको थियो । आर्मीले जावलाखेल युथ क्लबलाई टाइब्रकेरमा ५–३ ले हराएको थियो । प्रतियोगिताको विजेताले उपाधि सहित ५ लाख र दास्रो हुने टोलीले २ लाख ५० हजार रुपैयाँ प्राप्त गर्नेछ ।

प्रतियोगिताको उत्कृष्ट खेलाडी र सर्वाधिक गोलकर्ताले समान ३० हजार रुपैयाँ पाउनेछन् । नेपाल जनरल मार्केट (हिरो) ले मुख्य प्रायोजन गरेको छ प्रतियोगितामा चन्द्रागिरी नगरपालिका, युनाइटेड सिमेन्ट लगायतले पनि प्रायोजन गरेका छन् । प्रतियोगिता मंसिर ५ गते सकिनेछ ।

चन्द्रागिरी गोल्ड कपमा शुक्रबार
हिमालयन शेर्पाविरुद्ध एपिएफ